Komandante PNTL Munisípiu Dili, Armando Monteiro. Imajen/Antonio Goncalves

DILI, 23 setembru 2019 (TATOLI)-Durante semana ida ne’e nia laran, Komandu Polisia Munisipiu Dili konsege kaptura suspeitu na’in 16 ne’ebé envolve iha kazu krime iha area jurizdisaun Munisípiu Dili.

Husi suspeitu na’in 16 ne’e, PNTL kaptura mós suspeitu prinsipál balun ne’ebé envolve direita iha kazu taa kanek joven na’in tolu hanesan, JJ, AB no JC iha área Beto Leste, Bai Leste, Suku Madohi, Postu Administrativu Don Aleixo no Suku Bebonuk parte tasi ibun nian iha domingu (15/09/2019).

“Suspeitu sira ne’e envolve iha kazu tentativa integridade fíziku agravadu no kazu tentativa omisídiu iha área Aimutin, Comoro no Bebonuk-Lurumata nian, ne’ebé ami detein hamutuk ema na’in 16, primeiru ema na’in hitu (7) no ami kaer tan na’in sia (9),” informa Komandante Polisia Munisipiu Dili, Superintendente Xefe Armando Monteiro, ohin, ba jornalista iha Komandu PNTL, Caicoli, Dili.

Armando esplika, suspeitu sira ne’e PNTL kaptura liu husi investigasaun kle’an no kuidadu tebes envolve ekipa koordenada entre Ofisial Polisia Suku (OPS), autoridade suku hodi buka tuir suspeitu sira nia paradeiru too kaptura iha sira idak-idak nia hela fatin.

Suspeitu sira ne’e PNTL aprezenta ona ba Ministériu Públiku hodi prosesa tuir lei bazeia ba faktu ne’ebé PNTL aprezenta.

Iha parte seluk, PNTL apresia seguransa ba selebrasaun festa loron INTERFET ba dala 20 iha loron 20 setembru 2019 la’o di’ak no eventu feira no konsertu múzika sira ne’ebé realiza iha Jardín B.J. Habibie la’o di’ak hodi anima komunidade Dili.

Komandu PNTL Dili mós apresia situasaun seguransa durante misa inaugurasaun Gruta Sagrado Coracão de Jesus iha Aituri Laran, Taibesi Dili, ne’ebé lidera husi Bispu Dioseze Dili, Virgilio do Carmo da Silva , SDB, domingu (20/09/2019).

“Ita apresia ema besik rihun 12 liu reprezenta husi munisípiu 12 mai partisipa misa eventu ho di’ak tebetebes,” dehan Armando. Monteiro

Tuir planu, tersa (24/09/2019), Komandu PNTL sei koordena mós ho Grupu Hadomi Ambientál no sosiedade sivíl sei selebra loron klimátiku ho marsa ba dame iha Palásiu Govern ba iha Jardín B.J. Habibie.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here