Diretór Jerál Finansa Estadu Ministériu Finansa (MF), Januario da Gama, bainhira ko’alia iha panorama orsamentál 2019 iha MF Aitarak Laran. Imajen Egas Cristovão

DILI, 23 setembru 2019 (TATOLI)- Komisaun Revizaun Orsamentu Politika (KROP) finaliza ona diskusaun téknika ba pakote tetu fiskál 2020 hodi entrega ba Ministériu Finansa (MF) atu tetu hodi halo filterizasaun no avalia ba proposta plafon adisionál ne’ebé hatama husi ministériu no instituisaun públika sira ho montante millaun $750.

Tuir tetu fiskál ne’ebé aprova ona iha Konsellu Ministru no distribui ba ministériu no instituisaun públika sira biliaun $1.6.

“Iha posibilidade tetu fiskál 2020 ho biliaun $1.6 sei aumenta tanba iha kompromisu polítiku foun lubuk ida maka tenke hatán liuhosi proposta adisionál”, Diretór Jerál Finansa Estadu, Januário da Gama, afirma hafoin diskusaun Komité Revizaun Orsamentu Politika (KROP), iha edifísiu Ministériu Finansa Aitarak-Laran, ohin.

“Ami diskute hodi hala’o prosesu defilterizasaun tékniku para oinsá ita bele fundamenta katak nesesidade ba adisionál ne’e iha duni ou lae, prosesu filterizasaun no verifikasaun no atualizasaun ikus mak Ministériu Finansa sei komprova ba proposta adisionál sira ne’e hotu no ninia arruma finál ami sei aprezenta ba konsellu ministru”, katak.

Diskuasaun iha KROP hahú husi loron dahuluk to’o finaliza iha segunda ne’e, ho diskusaun progresivu tebes tanba hala’o verifikasaun no filterizasaun maka’as tanba OJE 2020 Governu hakarak halo enkuadramentu legál ba prioridade nasionál hanesan iha kapitál sosiál, setór ekonomia no infrastrutura no setór institusionál.

Iha diskusaun KROP, nia dehan haree katak husi pakote tetu fiskál ne’ebé distribui ba kada ministériu no instituisaun públika sira seidauk sufisiente atu kobre hotu sira-nia nesesidade ein termu programa no atividade iha 2020.

Nune’e, Januário dehan ministériu no instituisaun públika sira mai aprezenta no justifika kona-ba proposta adisionál balun atubele top-up sira-nia despeza iha 2020.

“Proposta adisionál ne’ebé tama ne’e millaun $750 , maibé ida ne’e seidauk plafon finál ba adisionál ninian tanba Ministériu Finansa kontinua halo filterizasaun no halo validasaun hodi evita duplikasaun husi pakote orijinál ne’ebé distribui ona”, akresenta

Pur tantu MF sei haree para responde ida ne’e maibé nia finál ba plafon proposta adisionál hodi aumenta ba pakote orijinál MF sei kontinua halo para sesta (27/09) ne’e mak aprezenta ba iha Konsellu Ministru.

Ba proposta adisionál sira, nia dehan, KROP halo ona apresiasaun finál no kontinua orienta ba MF atu halo apresiasaun, atualizasaun liuhosi filterizasaun no avaliasaun hodi aprezenta ba iha Konsellu Ministru.

Hafoin KM aprova, MF mós sei prepara ona dokumentu suplementár sira hanesan livru orsamentu husi livru númeru ida to’o neen hodi bele aprezenta ho proposta lei ba iha Parlamentu Nasionál iha loron 15 outubru tinan nee.

“Tuir ita-nia lei jestaun orsamentu no finanseira neebé estipula katak kalendáriu ba ezekusaun termina iha loron 15 outubru,” katak.

Diretór Jerál Januario Gama adianta distribuisaun orsamentu ba 2020 konsentra ba sekuénsia prioridade sira neebé Governu determina atu despeza sira ne’e favorese ka fó benefísiu ba populasaun.

Iha OJE 2020 posibilidade aumentu, nia dehan sei foku ba kontrolu no asegura mós fronteira marítima ka tasi Timór.

“Ita ratifika no troka ona nota diplomátika ho Austrália entaun ita presiza atu investe oinsá para bele iha kontrolu ida másimu ba movimentu iha Kosta Súl, movimentu iha ita-nia plataforma para ema labele halo illegal fishing liuliu atu kontrolu di’ak liután ita-nia tasi ka fronteira marítima ne’ebé ita manán tiha ona”,.splika.

Januário salienta la’ós ba ida ne’e de’it, maibé programa no kompromisu lubuk ida ne’ebé Governu introdús hodi hakbesik despeza sira ba abitante sira iha área rurál, postu administrativu no munisípiu.

OJE 2020, Governu hakarak ho prinsípiu ida reforsa setór sosiál, setór ekonomia, infraestrutura no boa governasaun no institusionál.

“Proposta adisionál sira seluk ne’ebé hato’o mai ne’e mós tenke aloka ho sekuénsia sira ne’e para ita bele haree postura orsamentál ne’e rasik nia ekudramentu tenke fó konsentrasaun ba iha setór sira ne’ebé importante liu hanesan setór kapitál sosiál, ekonomia, fundu infraesturura”, nia afirma.

Enkuantu, despeza institusionál ka boa governasaun tenke akomoda, maibé nia balansu labele boot liu fali husi setór sira seluk. Tanba hanesan instrumentu ida hodi fó apoiu ba implementasaun programa iha setór prioridade Governu nian.

Ezekusaun OJE 2019, nia dehan, hanesan fatór ida KROP mós uza hodi komprova proposta adisionál sira ne’ebé mak mai.

Maibé ko’alia modelu orsamentu fatór ida dezempeñu ezekusaun, la’ós fatór ida ne’ebé esensiál tebes atu sai sukat .

“Ita obriga ministériu sira atubele gasta osan barak liu, maibé la hatudu nia dezempeñu no rezultadu di’ak ne’e ita gasta osan arbiru”.

Tanba ne’e iha OJE 2020, Governu hakarak defende orsamentu atu gasta osan oituan, maibé ninia rezultadu mak tenke di’ak hodi fó benefisiu ba populasaun sira.

Jornalista : Florencio Miranda Ximenes
Editor : Maria Auxiliadora

HAKEREK NO HATÁN

Please enter your comment!
Please enter your name here