Traballadór sira iha Acelda halo hela produsaun. Foto TATOLI: Cancio Ximenes

BAUCAU, 23 setembru 2019 (TATOLI)—Diretór Kompañia Acelda, Higino da Costa Freitas, hateten kami-musan rua bele prodús ba mina-kamii litru ida no iha loron ida-nia laran kamii kilograma 400 bele prodús ba mina-kamii kilograma 200 (200kg).

“Prosesamentu atu prodús kamii sai mina-kamii ne’e serbisu tuir oras hahú tama serbisu 8:00 dadeer to’o tuku 16:00 loro-kraik. Iha loron ida, ami bele prosesa kamii kilograma 400 hodi prodús ba mina-kamii 200kg. Tanba, kami-musan rua (2), ami bele prodús ba mina litru ida,” dehan Diretór Kompañia Acelda, Higino da Costa Freitas, ba Ajénsia TATOLI liuhusi entrevista iha ninia rezidénsia, Darasula, Gariuai, Baucau, segunda (23/09/2019).

Nia hatutan, Acelda prodús ona mina tradisionál maibé merkadu mak limite tebes, Se iha futuru mak merkadu aumenta tan, ita mós bele aumenta volume mákina no aumenta tan traballadór sira atu nune’e bele responde ba merkadu.

“Ita agora tama ba merkadu Xina. Se ba oin mak merkadu Xina husu barak mina-kamii duni, entaun ema ne’e husu ezijénsia fulan ida ita tenke suporta dala rua, ita mak esforsu aan,” nia dehan.

Tanba, nia esplika, ita haree fila fali ba matéria prima hanesan kamii ne’e mai husi agrikultór sira. Maibé ita haree katak iha tempu Portugés no Indonézia, volume kamii sa’e maibé ita tama  ba ukun aan volume kamii menus tebes tanba iha terrenu ita haree kamii ne’e ema tesi estraga mak barak maibé atu kuda fali ne’e laiha.

Tanba ne’e, nia husu ba Ministériu Agrikultura halo planu oinsá para ita aumenta kuda fila fali kamii halo replantasaun para aban bainrua merkadu boot, ita responde fali ba merkadu nia nesesidade.

Entretantu, nia informa, hahú husi 2005 to’o agora mina-kamii esporta ona ba Amérika. Tuir  kontratu ne’ebé iha, tinan ida Acelda esporta mina-kamii dala tolu no tuir mós situasaun no  kondisaun iha Amérika ne’ebá. Dalaruma, Acelda esporta de’it dala ida no dalaruma tinan ida dala rua.

“Hanesan ita esporta dala ida bidón hamutuk 76, ita sura ba ninia tonelada karik 15.200kg. Kompañia ne’ebé sosa mina-kamii ne’e mai husi Amérika  husi Universidade Hawai,” nia informa.

Tuir peskiza ne’ebé universitáriu iha Universidade Hawai halo, nia esplika, mina-kami ne’e di’ak ba ema-nia saúde liuliu ba ema-nia kulit tanba mina-kamii sira halo prosesamentu ne’e hodi halo ba kozmétika, sabaun, mina no kose fuuk no isin-kulit no mós sira halo ba aimoruk vitamina.

Karik iha apoiu ruma husi Governu Timor-Leste, nia hatán, durante ne’e Acelda seidauk tane liman ba Governu para atu fó buat ruma maibé ho kosar-been rasik. Tanba ne’e, nia husu, ba oin Governu bele tau matan ba investimentu ida ne’e tanba nu’udar timoroan presiza mós suporta husi ita-nia Governu.

Aleinde ne’e, Diretór Acelda fó mensajen ba universitáriu sira tenke aprende katak ita tenke halo buat ruma ba rai ida ne’e. Tanba, na dehan, ita-nia rai ne’e bokur tebes tansá ita buka serbisu iha rai li’ur de’it maibé ita mós buka meius oinsá para dezenvolve iha ita-nia rai laran hanesan indústria para kompete iha merkadória.

Mákina hirak ne’ebé prodús mina-kami ne’e mai husi Universidade Hawai no mákina tais-mina ne’e mai husi Kanadá. Traballadór sira ne’ebé haknaar-aan iha Kompañia Acelda hamutuk ema na’in-12 kompostu husi mane 12 no feto tolu (3).

Jornalista: Felicidade Ximenes

Editór     : Rafy Belo

HAKEREK NO HATÁN

Please enter your comment!
Please enter your name here