Reitór UNDIL, José Agostinho da Costa Belo, ba jornalista sira hafoin sorumutu ho Sekretáriu Estadu Komunikasaun Sosiál, Mericio Juvenal dos Reis Akara, iha Palásiu Governu, ohin. Foto Egas Cristovão

DILI, 23 setembru 2019 (TATOLI)–Reitór interinu Universidade de Dili (UNDIL), José Agostinho Belo nomeadu husi Konsellu BOAKRIL hodi sai reitór ba universidade privada ne’e ba mandatu 2018 to’o 2020 no ohin ofisialmente simu pose.

Eis-Magnifíku Reitór UNDIL, Estevão da Costa Belo husu ba reitór emposadu, José Agostinho Belo atu serbisu maka’as hadi’a problema ne’ebé oras ne’e konsidera nu’udar “Trabalho Para Casa” ka TPC.

“Sai reitór la’ós de’it ko’alia mak barak maibé buka atu haka’as aan hodi tau-matan ba nesesidade iha UNDIL nia laran tanba agora ne’e mundu globalizadu, ne’ebé ezije dinámika akadémiku nian tenke maka’as liután,” hateten Eis-Prezidente BOAKRIL, Estevão da Costa Belo iha serimónia tomada pose reitór UNDIL foun, iha salaun UNDIL, Mascarenhas, ohin.

Akadémiku ne’e esplika problema haat ne’ebé sai TPC ba reitór emposadu tenke sai prioridade. Tanba ne’e, tenke esforsa maka’as hodi halo avaliasaun ba programatika hodi hadi’a saida mak iha ona atu bele sai di’ak liután.

Presiza mós halo peskiza tanba iha mundu akadémiku nian asuntu peskiza mak tenke maka’as inklui mós avaliasaun tanba UNDIL hakarak ka la kohi tinan oin tenke iha pós-graduasaun. Nune’e iha era dijitál ne’e ejize UNDIL atu hadi’a ninia aan tanba hakarak lori instituisaun ne’e atu kompete ho instituisaun seluk iha mundu; asuntu ida ne’e mós importante tebes.

“Tanba ne’e ha’u apela ba ha’u nia kolega magnífiku reitór Jose Belo atu konsidera kestaun haat ne’e nu’udar Trabalho da Casa. Serbisu maka’as di’ak liu duke ko’alia mak barak,” tenik eis reitór ne’e.

“Maibé la signifika reitór foun ne’e ema ida la iha esperiénsia antes ne’e, nia asume ona kna’ar nu’udar reitór interinu durante tinan barak hodi lidera UNDIL. Problema de’it ninia lideransa ne’e foin mak hetan pose,” nia reforsa tan.

Akadémiku UNDIL ne’e konsidera Magnífiku Reitór José Belo figura ida ne’ebé iha ona esperiénsia lubuk ida.

“Presiza de’it atu ajuda nian mak fó hanoin ona kona-ba problema haat ne’ebé instituisaun privada ne’e sei enfrenta hela. Esperansa ba oin labele husi reitór mesak atu hulan naha todan ne’e maibé presiza kolaborasaun parte hotu nian,” nia espera.

Iha biban hanesan, Reitór UNDIL Foun, José Agostinho Belo kompromete katak sei aselera planu prioridade tolu ne’ebe nia trasa ona liu liu atu garante kualidade ba estudante sira iha futuru.

Planu prioridade tolu ne’e, tuir magnífiku reitór UNDIL ne’e katak tinan ida ne’e nia tenke realiza graduasaun ba estudante sira, departamentu ka programa sira ne’ebé seidauk hetan akreditasaun tenke rezolve  no ikus mak fasilidade tenke adekuadu ba estudante sira.

Husi mandatu tinan lima ne’e, reitór emposadu ne’e hateten nia sei hadi’a neineik hodi bele atinje kualidade ba estudante sira atu nune’e bele garante liután ba estudante sira atu kompete.

“Ami tenke haree sira hodi kompleta fasilidade ne’ebé di’ak atu sura bele garantidu ka fiar aan hodi kompete,” tenik Reitór José Agostinho ba jornalista sira iha salaun UNDIL, Mascarinhas segunda (23/09/2019).

Akadémiku ne’e mós informa katak oras ne’e daudaun instituisaun privada ne’e sei iha departamentu rua mak seidauk hetan akreditasaun mak Saúde públika no Enjiñária.

“Esforsu ne’ebé iha mak buka ona kompleta regulamentu husi ANAAA nia atu nune’e ba oin bele hetan rekoñesimentu atu estudante sira bele tama ba graduasaun,” kompromete Reitór José Agostinho Belo.

Jornalista : Tomé Amado

Editór: Rafy Belo

HAKEREK NO HATÁN

Please enter your comment!
Please enter your name here