DILI, 23 setembru 2019 (TATOLI) – VIII Governu Konstitusionál asina tan akordu subvensaun annuál ho Konferénsia Episkopál Timoroan ba tinan fiskál 2019, nu’udar implementasaun akordu ne’ebé halo ona entre Governu Timor-Leste ho Santa Sé.

Governu aloka millaun $10 ba Konferénsia Episkopál, ne’ebé sei fó prioridade ba edukasaun pursentu 50, sosiál pursentu 25, governu ekleziál pursentu 15 no jestaun pursentu 10.

Prezidente Konferénsia Episkopál, Bispu Don Norberto Amaral, agradese atensaun Governu ba Igreja Katólika, ne’ebé halo tuir ona akordu konkordata ne’ebé hatúr ona.

Prezidente Konferénsia Episkopál, Bispu Don Norberto Amaral. Imajen/Tatoli.

“Ba tinan 2019, halo fali akordu  annuál ba faze daruak no husi Governu dispoin ba subvensaun hamutuk millaun $10. Agradese ba laran di’ak no esforsu tomak hodi trata ho di’ak, liliu ekipa komisaun ne’ebé trata asuntu ne’e hotu ho pontu ne’ebé sei hala’o, liliu ba subvensaun Governu atu kontribui ba Igreja Katólika Timor-Leste”, tenik Bispu Don Norberto Amaral ba jornalista sira iha salaun Ministériu Finansa, segunda ne’e.

Notísia Relevante: Igreja no Governu Hahú Enkontru Hodi Estabelese Ekipa Diskute Konkordata ho Santa Sé

Iha ámbitu seremónia asinatura, Primeiru-Ministru (PM), Taur Matan Ruak, rekoñese papél Igreja Katólika durante luta libertasaun nasionál, tuir saida mak konsagra ona iha Konstituisaun no kontinua dezempeña papél fundamentál iha faze dezenvolvimentu nasionál, presta ho kualidade servisu edukativu, saúde, apoiu ba ema ne’ebé presiza, vulnerável no dezfavoresida, ho sentidu karidade ne’ebé boot.

Tuir Xefe Governu, Igreja Katólika nu’udar parseiru ne’ebé ativu, iha kompromisu, no sempre hakbesik ba Estadu ho autoridade no komunidade, ne’ebé serbisu ba nasaun maibé seidauk hetan benefísiu hosi servisu públiku sira.

“Kontribui hotu ba edukasaun sívika ne’ebé importante ba boa-formasaun ba sidadaun sira, la’ós ba nível tékniku ou sientífiku iha enúmera eskola no estabelesimentu ensinu ne’ebé implementa no kompleta rede ensinu públiku, maibé importante mós iha vertente morál, étika no disiplina iha nível umanu no relijiozu”, tenik PM Taur.

PM dehan, investimentu Governu ba subvensaun jestaun  Konferénsia Episkopál ba interese públiku, ne’ebé fó fiar ba Igreja Katólika  atu fó prestasaun servisu liuhosi investimentu ne’ebé Estadu tau atensaun.

Entretantu iha lorom 14 agostu 2015, Governu Timor-Leste no Santa Sé asina akordu ida ho objetivu atu implementa kuadru jurídiku relasaun entre Estadu rua.

Akordu ne’e ratifika liuhosi Rezolusaun Parlamentu Nasionál nú. 8/2015 11 novembru, ne’ebé prevee kontribuisaun annuál disponibilidade finanseiru Governu ba atividade sira ho karáter sosiál, edukativu no Governu Ekleziál Igreja Katólika.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here