Xefe Estadu Maiór Jenerál FALINTIL-FDTL, Majór Jenerál Lere Anan hala’o enkontru ho Almirante Xefe Estadu Maiór Jenerál Forsa Armada Fiji, Contra Dimirante Viliame Naupute hodi diskute kooperasaun defeza forsa rua. Imajen/Eugénio Pereira

DILI, 21 setembru 2019 (TATOLI)- Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, sei hato’o ba Governu Timor-Leste atu envolve Forsa Defeza Indonézia (TNI-sigla indonézia) no Nova Zelándia iha ezersísiu militár “Harii Hamutuk”.

Lere dehan, ezersísiu Harii Hamutuk  ne’ebé envolve Forsa Defeza nasaun haat, kompostu husi Timor-Leste, Japaun, Austrália no Estadu Unidu Amerika (EUA) ne’ebé halo ona tinan (7) kria kooperasaun di’ak tebes  entre forsa nasaun haat hodi fahe esperiénsia ba malu hodi promove dame ba mundu.

Komandante Lere dehan, nia rasik propoin Tentara Nasional Indonesia (TNI) ba futuru tenke envolve iha ezersísiu ne’e, tanba Timor-Leste no Indonézia iha esperiénsia funu tinan 24 maibé ohin loron militár nasaun rua serbisu hamutuk fila fali atu promove fali dame ba mundu tomak.

“Bainhira ha’u kuandu hasoru malu ho almirante Jenerál Amerikanu nian ne’ebé toma konta ba Asia Pasífiku nian, ha’u dehan envezde ita nasaun haat de’it, (Japaun, Timor-Leste, Austrália no Amerika), di’ak liu ita bolu tan Indonézia no Nova Zelándia tama iha ezersísiu Harii Hamutuk ne’e. Maibé nasaun tolu ne’e aseita atu haree ba futuru, militár Indonézia no Nova Zelándia mai hanesa observadór depois mak ba oin sira bele envolve ona,” informa  Lere Anan Timur ba jornalista, ohin,  iha Kuartél Jenerál F-FDTL, Fatuhada, Dili.

Majór Jenerál Lere Anan Timur apresia forsa nasaun haat hatudu ba mundu katak, forsa maka sai ezemplár atu haklaken dame iha povu ho nasaun no ajuda povu liu husi serbisu ne’ebé sira prodús.

Misaun serbisu ezersísiu Harii Hamutuk maka buka apoiu ajuda solidariedade ba povu, reabilita uma, infraestrutura eskola sira ne’ebé aat, dada bee moos ba povu, ajuda povu iha situasaun sofre dezastre naturál sira no seluk tan. 

Jornalista       : Eugénio Pereira

Editór             : Francisco Simões

HAKEREK NO HATÁN

Please enter your comment!
Please enter your name here