Kontra-atake entre ekipa FALINTIL no INTERFET iha Estádiu Munisipál Dili, ohin. Imajen Ilídio Ximenes da Costa

DILI, 20 setembru 2019 (TATOLI) – Ekipa FALINTIL konsege empata 1-1 ho Armada INTERFET iha jogu amizade ne’ebé hala’o iha Estádiu Munisipál Dili, sesta ne’e.

Jogu entre ekipa rua halo rame tebes Estádiu Munisipál Dili tanba ekipa rua mesak ema importante hotu. Ekipa Timor-Leste lidera hosi Eis Komandante FALINTIL, Kay Rala Xanana Gusmão no eis Gerilleiru seluk-tan. Enkuantu, ekipa INTERFET lidera hosi eis Komandante INTERFET, Peter Cosgrove.

Iha minutu primeiru jogu hahú, ekipa rua lansa kontra-atake ba malu ho rítmu ne’ebé neneik hodi pasa bola ba malu.

Monu ba minutu 6, ekipa Lafaek (FALINTIL) liuhosi parte defeza ladún kontrola avansadu Kanguru (INTERFET) nian ho di’ak, jogadór ho númeru kamizola 12 marka kedas golu dahuluk ba rede Lafaek. Guarda rede, Xanana Gusmão, maski tuda-aan, la konsege salva bola tanba bola duir mai ho rítmu maka’as.

Jogu ne’e ho durasaun badak. Minutu rua-nulu de’it. Hafoin jogu primeira parte ramata, ekipa rua tenke deskansa minutu 5. Iha segunda parte, ekipa rua kontinua hala’o kontra-atake ba malu. Ekipa FALINTIL liuhosi jogadór númeru 17, konsege fura duni rede INTERFET hodi hatuur rezultadu sai 1-1 iha minutu 15.

Hosi golu ne’ebé Timor-Leste hatama hanesan golu ikus ona ba ekipa rua tanba maski jogu la’o ho ritmu maka’as maibé la rezulta tan golu.

Eskuad FALINTIL

Eis Komandante FALINTIL, Kay Rala Xanana Gusmão (1),  Xefi Estadu Maiór Lere Anan Timur (7), Tenente Koronél Lobu (2), Tanente koronél Haksolok (4), Maijór Niki (8), Brigadeiru Aluk (6), Brigadeiru Jenerál Falur Rate Laek (12), Kapitaun Mari Guerra (14), Koronél Maubuti (13) no Sarjetu Xefe Aquito (17).

Suplente:

Tanente Koronél Remildi (18), Maijór Tofa (19), Kapitaun Juvenil (3), Sarjentu Xefe Melikai (5) no Primeiru Sarjentu Sakunár Matebian (10). Treinadór, Drendin Natalino Márques.

Entretantu, iha jogu ne’ebé hala’o iha fatin hanesan entre ekipa F-FDTL VS Forsa Austrália hamutuk ho Nova Zelándia, vitória monu ba F-FDTL ho rezultadu 2-0. Golu F-FDTL próduz hosi jogadór númeru kamizola 12 iha minutu 7 no golu ikus hatama hosi jogadór númeru kamizola 4 iha minutu 16.

Jogu refere realiza hodi selebra Tinan 20 Misaun INTERFET nian iha Timor-Leste.

Jogu refere dirije hosi árbitru Lasio Martins, juiz liña Salvador Cabral, Francisco Fátima no árbitru rezerva, Aniceto Berlelo.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here