Prezidente Repúblika, Francisco Guterres Lú Olo akompaña husi Eis Komandante INTERFET no Eis Governadór Jerál Austrália, Peter Cosgrove, lansa plaka Memoriál Onra ba INTERFET hodi selebra aniversáriu INTERFET ba dala-20 (20 setembru 1999-20 setembru 2019). Imajen/António Gonçalves

DILI, 20 setembru 2019 (TATOLI) – Prezidente Repúblika, Francisco Guterres Lú Olo, hateten Forsa Internasionál ba Timor-Leste (INTERFET-sigla inglés) lori komunidade internasionál nia naran tama iha Timor kumpri Rezolusaun 1264 Organizasaun Nasaun Unida (ONU).

Membru ONU liuhusi Kapítulu VII Karta ONU nian aprova Rezolusaun 1264, iha 15 setembru 1999, ne’ebé autoriza harii forsa multinasionál ida atu mai Timor-Leste.

Rai sira ne’ebé halo parte INTERFET mak Austrália, Nova Zelândia, Estadu Unidu Amérika, Reinu Unidu, Tailândia, Brazíl, Canadá, Fijí, França, Alemaña, Irlanda, Itália, Jordânia, Kenya, Malázia, Noruega, Paquistão, Filipina, Portugal, Singapura no Korea Súl.

Nia esplika, misaun ne’e nia prioridade mak atu harii fila fali pás no estabilidade iha Timor-Leste. Forsa Internasionál ida ne’e lidera hosi Austrália, ho komandu Jenerál Peter Cosgrove, ne’ebé ikus mai sai Governadór-Jerál Austrália.

“Ita-nia mehi atu kore-aan hosi domíniu estranjeiru nakfila ba realidade iha loron 30 agostu tinan 1999, bainhira ita-nia povu ho barani no laran-metin, hala’o ita-nia direitu ba autodeterminasaun liuhusi sufrájiu universál, sekretu no diretu, ne’ebé rekoñesidu iha mundu tomak. Ho supervizaun ONU nian, ita-nia populasaun besik pursentu ualu-nulu rejeita autonomia ho Indonézia no nune’e hili ukun rasik-aan,” Xefe Estadu dehan liuhusi ninia diskursu iha Komemorasaun Tinan 20 Prezensa INTERFET iha Timor, iha Paláçio do Governo, ohin.

Lú Olo haktuir, enkuantu INTERFET buka estabiliza situasaun, Forças Armadas de Libertação Nacional de Timor-Leste (FALINTIL) halibur-aan iha fatin akantonamentu iha Waimori-Laleia, Atelari-Baucau no mós iha Nahareka no Osolekimeta iha Ossú (Viqueque).

“Situasaun rungu-ranga no raan-fakar ne’e iha territóriu laran tomak hamosu sentimentu oioin  kahur-malu iha akampamentu sira-ne’e. Maski nune’e, FALINTIL konsege hakmatek-aan iha sira-nia hela fatin tanba hatene tiha ona katak dalan naruk luta nian habadak tiha ona. Sira la halo retaliasaun ida. Iha akantonamentu sira ne’e,  gerrileiru sira hakruuk nafatin ba orientasaun hosi komandu superiór atu mantein  disiplinadu, armadu no kumpri Akordu 5 Maiu asina iha Nova Iorke entre Portugál no Indonézia, katak autoridade indonézia sira mesak de’it mak kaer responsabilidade ba seguransa,” Prezidente Repúublika relembra.

Hafoin INTERFET tama Timor-Leste, organizasaun umanitária barak mós mai Timor-Leste hodi fó tulun aihan no asegura kuidadu saúde báziku emerjénsia ba refujiadu no dezlokadu sira.

“Ha’u aproveita oportunidade ida-ne’e hodi fó omenájen mós ba organizasaun sira ne’e, inklui voluntáriu rihun ba rihun ne’ebé kontribui ba hakmaan uituan  komunidade ne’ebé moris  iha susar laran,” katak Prezidente Repúblika.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here