Prezidente Repúblika, Francisco Guterres Lú Olo akompaña husi Eis Komandante INTERFET no Eis Governadór Jerál Austrália, Peter Cosgrove, lansa plaka Memoriál Onra ba INTERFET hodi selebra aniversáriu INTERFET ba dala-20 (20 setembru 1999-20 setembru 2019). Imajen/António Gonçalves

DILI, 20 setembru 2019 (TATOLI)-Estadu Timor-Leste dedika plaka memoriál onra hodi dedika ba INTERFET (International Force East Timor).

Familia husi matebian Tropa Austrália lori ai-funan no fotografia tau iha Plaka Memoriál Onra Ba INTERFET- Forsa Internasionál Ba Timor-Leste. Imajen/Eugénio Pereira

Dedikasaun ne’e oferese husi estadu Timor-Leste iha ámbitu komemorasaun loron prezensa INTERFET iha Timor-Leste ba dala-20 (20 setembru 1999-20 setembru 2019).

Plaka ne’e inaugura direita husi Prezidente Repúblika, Francisco Guterres Lú Olo akompaña husi, Eis Komandante INTERFET no Eis Governadór Jerál Austrália, Piter Cosgrove, iha Palásiu Governu, Dili.

Iha serimónia inaugurasaun ne’e Komandante Piter Cosgrove, ne’ebé iha tinan 20 liu ba komanda forsa INTERFET  hasai nia xapeu no hakru’uk ba plaka refere hodi hato’o nia agradesimentu boot ba Estadu Timor-Leste ba onra ida ne’e.

“Obrigadu, obrigadu,”  hateten Peter Crosgrove ba Prezidente Repúblika, Francisco Guterres “Lú Olo..

Serimónia ne’e kontinua ho tau ai-funan ba plaka refere  husi bainaka Senadora Linda Rounolds, Ministra Defeza Austrália, Ron Mark, Ministru Defeza Nova Zelándia, Durren Chester, Ministru Veteranu no Pesoál Defeza Austrália, Reprezentante Reinu Thailandia, Reprezentante husi Portugál, Japaun, Singapura, Filipina, Canada, no Fiji,  hodi hanoin hikas militár no sivíl sira ne’ebé mate  durante hala’o misaun pás iha Timor-Leste.

Iha serimónia ne’e, marka mós família hosi forsa Australia nian balun ne’ebé lori mós fotografia no ai-funan plaka.

Plaka ne’e hakerek: “Onra Ba INTERFET- Forsa Internasionál Ba Timor-Leste. Nasaun Independente Timor-Leste dedika plaka ida ne’e nu’udar rekoñesimentu ba dedikasaun no sakrifisiu husi soldadu no ema sivíl sira ne’ebé hola parte INTERFET. Povu Timor-Leste agradese ba feto no mane brani sira ne’ebé integra misaun INTERFET nian, nu’udar militár ka sivíl husi, Austrália, Nova Zelándia, Tailándia, Brazil, Canada, Fiji, Fransa, Alemaña, Irlanda, Italia, Jordánia, Kenia, Malázia, Noruega, Singapura, Filipina, Repúblika Koreia, Reinu Unidus no Estadu Unidus Amerika”.

Plaka ne’e sei ba tau iha eis edifísiu Misaun INTERFET Ponix Caicoli besik Tribunál Rekursu nian. Nune’e mós ai-funan ne’e lori kedas ba kari iha Semitériu Santa Krús Dili.

Embaixadór Austrália mai Timor-Leste, Peter Doyle, rekoñese aniversáriu ne’e no fó onra ba korajen no profisionalizmu husi tropa Australia no koalizaun ne’ebé serbisu lalais liu hodi tulun nasaun foun Timor-Leste no prevene atu labele iha lakon vida tan.

“Serbisu INTERFET no ninia misaun susesór sira esensiál tebes ba estabelesimentu kondisaun seguransa ne’ebé presiza ba harii nasaun,” dehan Embaixadór Doyle.

Austrália apresia tebes relasaun amizade besik ne’ebé iha momentu ne’ebá, TL no Austrália  hala’o ona no sai di’ak liu tan durante iha tempu susar nia laran.

 Austrália iha kompromisu atu serbisu hamutuk ho Timor-Leste atu asegura pás no prosperidade ba Timoroan sira iha tinan hirak tuir mai.

 Kolokasaun INTERFET ne’e ba dala uluk Austrália mak organiza no lidera operasaun manutensaun pás multinasionál. Nasaun 22 kontribui sira nia forsa ba INTERFET, ho tropa sorin-balu mai husi Forsa Defeza Austrália.

 Iha momentu ne’ebá, kuaze tropa na’in 5,700 husi Austrália, hamutuk ho ró no aviaun sira husi Naval Royal Austrália no Forsa Aero Royal Austrália mak kolokadu mai Timor-Leste hanesan parte husi misaun INTERFET.

 Pesoál sira husi Forsa Defeza Austrália nian sei marka prezensa iha Timor-Leste to’o ohin loron atu fó apoiu konsellu ba sira nia parseiru F-DFTL hanesan parte husi Austrália nia Programa Kooperasaun Defeza nian.

Antes ne’e, Embaixadóra Estadus Unidus Amerika mai Timor-Leste, Katleen Fitzpatrick dehan, durante operasaun INTERFET Amerika fornese membru 5.000 , ró militár boot hitu (7)  ho aviaun 100 hodi estabelese seguransa no ajuda forsa sira ba rekonstrusaun ba dame.

 Fó Onra ba Militár Koreia Na’in Lima

 Estadu Timor-Leste mós hato’o sentidu kondolénsia ba matebian militár Repúblika Koreia na’in lima (5) ne’ebé mate iha Oe-Cusse, hafoin asidente mota boot lori karreta iha loron 6 Marsu 1999.

Sira ne’ebé mate hanesan, Maiór Byong Jo Min, Maiór Jin Kyu Park, Kopral. Jong Hun Kembali no Kopral. Hee Choi  no Kim Jung Joung,

Misaun UNAMET- UNTAET Husi 1999-2012

Durante periodu tinan 1999 Misaun Observasaun Nasoins Unidu nia – UNAMET hahú organiza prosesu ba realizasaun referendu iha loron 30 fulan-Aguostu. Rezultadu sira fó sai husi Sekretáriu Jerál Kofi Annan fó vitória boot hodi hetan independénsia Timor-Leste ho porsentu 78,5%.  Nune’e, milísia pró-Indonézia sira kontinua lakon moral hodi halo violénsia boot to’o oho povu no leigu sira iha territóriu laran

Iha fulan-Outubru 1999, kuandu mandatu UNAMET hotu, Konsellu Seguransa ONU nia estabelese UNTAET – Administrasaun Tranzitóriu Nasoins Unidu nia iha Timor-Leste – mandatu ne’e iha operasaun atu mantén pás no  UNTAET mós ezerse autoridade administrasaun iha rai laran durante tranzisaun ba independénsia. Ikus mai, iha fulan-Agustu 2006 kria Misaun Integrada Nasaun Unidu nia iha Timor-Leste (UNMIT).

Hafoin atake sira ba Prezidente no Primeiru-Ministru Timor-Leste nia iha fulan-Fevereiru 2008, Nasaun Unidu haforsa mandatu iha vigór ho rezolusaun foun  misaun ne’e inklui hikas promosaun ba sistema judisiáriu ne’ebé di’ak iha 26 fulan-Fevereiru 2009, Konsellu Seguransa determina katak UNMIT tenke apoia organizasaun ba eleisaun previstu iha tinan 2009.

Liu tiha tinan ida, iha 26 fulan-Fevereiru 2010, Konsellu Seguransa solisita ba UNMIT atu apoia realizasaun eleisaun munisipál sira, rekonfigurasaun ba komponente polísia UNMIT nia no organizasaun ba prosesu pasajen responsabilidade polísia ninia ba PNTL.

Iha 24  fulan-Fevereiru 2011, Konsellu Seguransa adota Rezolusaun foun ne’ebé husu ba UNMIT atu apoia eleisaun ba parlamentu iha tinan 2012, konforme pedidu husi autoridade Timor nian. Iha rezolusaun ne’e reforsa mós importánsia ba konkluzaun ba prosesu kapasitasaun  reforma PNTL nia, nune’e mós ba kredibilidade no integridade polísia nasionál.

Halo parte husi mandatu Nasoins Unidus iha Timor-Leste, apoiu ba governu kona-bá kriasaun estabilidade, aumenta kultura ba governasaun demokrátiku no fasilitasaun ba diálogu polítiku, apoia ba polísia nasionál no akompaña iha revizaun ba papél nesesidade iha setór seguransa i reforsa kapasidade nasionál para akompaña, halo promosaun i fó protesaun ba direitu umanu nia.

UNMIT buka mós atu koordena programa ba ajénsia husi Nasoins Unidu ninia, ba fundu sira liuliu ba programa ba apoiu ho parseiru sira hodi halo konstrusaun ba pás pós-konflitu no ba nia kapasitasaun.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here