Responsável ekipa no mós eis-forsa INTERFET, Peter Paulo. Foto TATOLI: Nelia Borges

DILI, 19 setembru 2019 (TATOLI)-Ohin, veteranu INTERFET (International Forces for East Timor) ho naran “Mark Herewini 20th Anniversary of INTERFET tour” hamutuk na’in 23 kompostu husi mane na’in 21 no feto rua, vizita CNC (Sentru Nasionál Chega-sigla portugés) hodi haree hikas imajen istórika Timor-Leste (TL) nian ne’ebé konserva iha CNC, Balide, Dili.

Responsável ekipa no mós eis-forsa INTERFET, Peter Paulo sente orgullu no priviléjiu tanba bele hola parte iha misaun INTERFET nian hodi bele ajuda Timor-Leste.

“Ami sente kontente tanba iha parte ida ami bele ajuda Timór iha momentu ne’ebá hanesan INTERFET. Tanba ne’e, uainhira fila fali mai Timór, haree fila fali nasaun ne’e ho nia povu, ami kontente tanba ami bele kontribui ajuda hanesan INTERFET,” hateten eis-forsa terseiru Batallaun, Corporal Pioneer Platoon, Peter iha CNC, Balide, Dili.

Iha vizita ne’e, Peter Paulo realsa mós katak husi imajen istórika sira hatudu katak Timor-Leste liuhusi obstákulu oioin molok hetan nia independénsia.

“Ida ne’e fó hanoin fali ami momentu ami mai hanesan INTERFET no ami foti isin mate jornalista ida nian hanesan hatudu iha imajen, masakre iha Maliana, moras, tortura no sofrimentu ne’ebé maka timoroan sira sente momentu ne’ebá no imajen sira ne’e lori fila fali ami ba hanoin pasadu kona-ba ami-nia misaun,” konsidera Veteranu Australianu ne’e.

Nia rekoñese katak komparasaun Timor-Leste ho situasaun uluk agora iha mudansa maka’as. “Ha’u haree mudansa barak maka akontese iha rai ida ne’e. Ha’u haree mudansa iha infraestrutura. Ha’u mós kontente haree labarik barak maka mai no hamnasa”.

Hanesan komandante ba terseira Batallaun INTERFET mai iha Timor-Leste iha tinan 1999, Paulo iha esperansa katak Timor-Leste iha auto-sustentável. Katak, bele iha responsabilidade ba rai no ba aan rasik, la monu ba regra husi nasaun seluk ne’ebé hakarak hetan vantajen maske ekonomikamente normál iha momentu hanesan.

Iha biban hanesan, Veteranu INTERFET Australianu ne’e hato’o nia mensajen ba Timór relasiona ho komemorasaun aniversáriu ba dala rua nulu INTERFET tama Timor-Leste katak timoroan sira tenke iha sentimentu orgullu ba saida maka antepasadu (avó, bizavón) sira halo, liuliu labarik foin sa’e sira ne’e laiha ne’e, momentu ne’ebá (1999). “Tanba ne’e tenke orgullu ho saida maka sira halo no labele haluhan ida ne’e”.

Tuir ajenda, veteranu INTERFET sira ne’e alende vizita CNC, vizita mós Semitériu Santa Krús, Sentru Edukasaun no seluk tan.

Entretantu, Peter Paulo ne’ebé hanesan Komandante ba terseiru Batallaun INTERFET lance Corporal Pioneer Platoon iha momentu masakre 1999 Timor-Leste to’o iha Timór ho ró no hahú la’o to’o Hotel Turizmu hafoin ho nia INTERFET maluk sira ba liu Maliana hodi asegura Batallaun iha ne’ebá hodi muda sai, nune’e hakat liubá Oe-Cusse Enclave hodi hela metin iha ne’ebá to’o fulan lima.

Jornalista: Nelia Borges

Editór      : Rafy Belo

HAKEREK NO HATÁN

Please enter your comment!
Please enter your name here