Eis Komandante INTERFET, Peter Cosgrove, hala'o soru-mutuk ho Xefe Estadu, Francisco Guterres Lú Olo, ohin. Imajen Mídia PR

DILI, 19 setembru 2019 (TATOLI) – Eis Komandante International Force for East Timor (INTERFET), Peter Cosgrove, hala’o enkontru ho Prezidente Repúblika, Francisco Guterres Lú Olo, iha Palásiu Prezidente Nicolau Lobato,  Dili, ohin.

Iha enkontru ne’e, Prezidente Repúblika hateten katak Komemorasaun Tinan-20 Prezensa Forsa Manutensaun Pás hanesan komemora memória povu Timor-Leste no Austrália.

Tuir Xefe Estadu katak partisipasaun INTERFET iha Timor-Leste hamaran matan-been no hapara raan fakar nu’udar memória ne’ebé sei husik hela hosi jerasaun ba jerasaun.

Iha biban ne’e, Peter Cosgrove kontente bele vizita fila fali Timor-Leste ba dahuluk hafoin husik kargu nu’udar Governadór Austrália nian.

Peter Cosgrove apresia tebes ba povu Timor-Leste ne’ebé ho aten-brani ba vota iha 30 Agostu 1999 hodi desidi futuru nasaun.

Peter Cosgrove informa katak veteranu na’in-60 ne’ebé sei ativu iha Forsa Austrália nian no na’in-50 ne’ebé ba ona vida sivíl aban sei partisipa iha Komemorasaun Tinan-20 Prezensa INTERFET iha Timor-Leste.

Nia hatutan katak Austrália orgullu atu simu Xefe Estadu nia vizita no agradese Prezidente Repúblika ne’ebé sempre marka prezensa iha The Australian and New Zealand Army Corps ( ANZAC) Day tinan-tinan.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here