Diretór Jerál Ministériu Transporte no Komunikasaun, Tomás da Silva. Foto/Natalino Costa.

DILI, 18 setembru 2019 (TATOLI) – Diretór Jerál Ministériu Transporte no Komunikasaun (MTK), Tomas da Silva, hatete tetu fiskál ne’ebé Ministériu Finansa (MF) atribui ba MTK hamutuk millaun $5,6, maibé propoin tan adisionál millaun $11 ba nesesidade sira ne’ebé tau ona iha programa ba tinan oin nian.

“Ami nian orsamentu pakote fiskál ne’e liu ona no adisionál millaun $11 ne’e maka presiza halo ajustamentu hodi bele korresponde ba iha nesesidade ministériu nian bazeia ba iha programa ne’ebé prepara ona ba tinan oin”, Diretór Jerál ne’e dehan ba Tatoli iha MF Aitarak-Laran, ohin, hafoin aprezenta orsamentu ba KROP.

Nia dehan ba orsamentu adisionál ne’e rasik husi ministériu sei esforsu halo ajustamentu iha segunda (23/9) ne’e. Tanba tuir planu ne’ebé mak iha katak husi adisionál ne’e enkaixa ona atu halo terminál ba transporte públiku sira.

“Terminál ne’ebé maka ami hatama iha planu pakote ministériu nian mak terminál iha Hera, Manleuana no ami mós sei konstrui terminál ba munisipiu sira”, Diretór Jerál ne’e esplika.

Nia hatutan planu sira ne’ebé maka MTK halo iha ona pakote ba tinan oin la’ós harii de’it terminál, maibé akizisaun bis ne’ebé maka antes ne’e ministériu planeia ona.

Tanba ne’e maka ho akizisaun bis ne’e husi ministériu sei haree ba iha fatin hanesan estasionamentu, jestaun no asegura bus ho di’ak no oinsá halo manutensaun ba futuru. Nune’e mós sei halo termu referénsia ba bis ne’e rasik oinsá maka halo operasaun.

Aléinde ne’e, Diretór Jerál salienta husi orsamentu fundu dezenvolvimentu MTK nian ba tinan oin ne’e fó prioridade ba iha monta semáforu iha fatin tolu ne’ebé tama hotu ona planu ba tinan oin iha área Dili laran maka hanesan iha Kulu-hun, Elemloi-Delta no loja Foho Osan Mean-Audian nian oin.

Hatutan, maski orsamentu ba kapitál dezenvolvimentu seidauk iha nian númeru serteza tanba sei halo ajustamentu, maibé fiar katak osan ne’e sei atinje duni meta ne’ebé iha tanba nesesidade ministériu ne’e ejijente duni atu dezenvolve tan buat balun.

Iha fatin hanesan, Ministru Transporte Komunikasaun, José Agostinho da Silva, afirma iha aprezentasaun orsamentu MTK nian tetu millaun $5,6 pasa ona no adisionál millaun $11 ne’e ba nesesidade ministériu nian.

Jornalista :  Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here