Diretur Nasionál Orsamentu Estadu MF, Salomão Yoaquim. Foto/Media MF.

DILI, 19 setembru 2019 (TATOLI) – Komité Revizaun Orsamentu Polítika (KROP), ohin, finaliza ona diskusaun ba Orsamentu Jerál Estadu (OJE) 2020 husi liña ministériu sira.

“Reuniaun Komité Revizaun Orsamentu Polítika husi ministériu sira finaliza ona ohin, hela de’it diskusaun grupu tékniku ba kapitál dezenvolvimentu, grupu tékniku ba adisionál sira, grupu tékniku ba FDCH sira ne’e halo mudansa ba oráriu, tan ne’e sei hala’o fali iha loron sábadu (21/9)”, afirma Diretór Nasionál Orsamentu Estadu Ministériu Finansa, Salomão Yoaquim, ba Tatoli hafoin soru-mutu KROP iha Aitarak-Laran, ohin.

Salomão Yoaquim hatutan iha domingu (22/9/) husi ekipa téknika sira arruma finál no segunda (23/9/) aprezenta filafali ba KROP ne’ebé prezide hosi Primeiru-Ministru, Taur Matan Ruak, hodi foti desizaun ba finál globál ba OJE 2020 versu KROP.

Diretór Nasionál ne’e dehan, durante semana rua KROP observa katak, tuir loloos labele akontese tan ona proposta adisionál tanba antes realiza KROP fó ona orientasaun ba governante sira relasiona ho tetu OJE 2020 nian ne’ebé atribui iha envelope fiskál.

“Ami nia observasaun katak tuir loloos iha ona orientasaun ba membru Governu sira hotu katak envelope fiskál ne’ebé distribui ona ne’e iha ona orientasaun tanba iha ona sirkulár dehan katak kapasidade ita-nia OJE 2020 ho montante hanesan ne’e, nune’e hothotu tenke kumpre tuir no la presiza ona adisionál”.

“Maibé nafatin ministériu, ajénsia sira submete adisionál iha Komité. Maski nune’e, Komité labele hapara proposta adisionál sira ne’e hotu, tanba ne’e polítika instituisaun sira nian para atu dudu bá oin”, haktuir Salomão.

Salomão esklarese, prosesu diskusaun hahú hosi setór sosiál, ekonomia, institusionál no ikus liu infraestrutura. Iha loron segunda sei aprezenta mós hosi Komité Kapitál Dezenvolvimentu, no FDCH inklui Dotasaun Todu Governu ho kategoria diferente.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here