Xefe Suku Kampung Alor, Alcina Carvalho dos Santos. Imajen/Osória Marques

DILI, 19 setembru 2019 (TATOLI)-Timoroan sira konsidera prezensa misaun INTERFET (International Force for East Timor)  iha  tinan 20 liubá (20 setembru 1999-20 setembru 2019) lori esperansa foun tanba bele salva sira ninia vida no nasaun foun  ne’e  husi intimidasaun ho torturasaun milísia pro-autonomia.

Xefe Suku Kampung Alor, Postu Administrativu Dom Aleixo Munisípiu Dili, Alcina Carvalho dos Santos, hatete, INTERFET nia prezensa iha Timor-Leste salva Timoroan husi intimidasaun ne’ebé lansa husi milisia pro-autonomia iha territóriu.

“Ohin loron Ita Timoroan hotu sente haksolok no goza ba loron INTERFET ba dala 20,” hateten Xefe Suku Kampung Alor, Alcina Carvalho dos Santos, ohin, ba TATOLI iha Sede Suku Kampung Alor, Dili.

Nia relembra katak iha tinan 1999 ho prezensa misaun INTERFET maka konsege atua situasaun brutalismu no persegisaun husi milisia pro-Jakarta.

“Lakleur Ami rona dehan INTERFET Tama ona iha ita rai doben TL entaun  ha’u sente kontente no dehan nune’e ita-nia salvasaun mai ona, salvasaun mak INTERFET tamba ne’e ha’u agradese tebes ba Maromak,” hateten Alcina Carvalho dos Santos hodi relembra situasaun momentu ne’ebá.

Sentimentu hanesan hato’o mós husi Komunidade Suku Marconi, Mastura Ismael Umar. Nia  dehan, ho prezensa misaun INTERFET maka konsege rekoopera situasaun seguransa iha momentu ne’ebá.

“Ha’u orgullu tebes ho prezensa INTERFET nian mai TL no agradese no parabens ba loron INTERFET ba dala 20,” Umar hateten.

Misaun INTERFET  lidera husi Austrália ho kontribuisaun  husi  nasaun 21  ho forsa militár purvolta 11.000 husi Austrália, Estadu Unidu Amérika (EUA), Bangladeza, Filipina, Malázia, Pakistaun, Singapura, Tailandeza, Alemaña, Kanadá,  Portugal, Fransa, Itália, Kenya, Korea do Súl, Brazíl no seluk tan, hodi garantia manutensaun pás ba Timor-Leste iha periodu 1999.

 Jornalista         : Osória Marques

Editór                : Francisco Simões

HAKEREK NO HATÁN

Please enter your comment!
Please enter your name here