Diretór Jerál Autoridade Aduaneira (AA), José António Fátima Abílio. Imajen/Egas Cristovão.

DILI, 19 setembru 2019 (TATOLI) – Diretór Jerál Autoridade Aduaneira (AA), José Antonio Fátima Abílio, hatete reseita husi Autoridade Aduaneira (AA) ka Alfándega iha 2019 millaun $46.

Diretór Jerál ne’e dehan taxa ne’ebé Alfándega arrekada depende ba frekuénsia importasaun nian.

“Kuandu volume importasaun tun klaru katak taxa mós tun. Kompara ho tinan kotuk, ita sei menus, se haree gráfiku. Totál tinan kotuk sa’e, maibé agora ho impasse polítika, to’o agora sei menus ka seidauk alkansa trajetu ne’ebé Ministériu Finansa fó mai Autoridade Aduaneira”, José António ba jornalista sira iha ámbitu asinatura protokolu kooperasaun entre Banku Nasionál Komérsiu Timor-Leste ho AA, iha área Palásiu Governu, ohin.

Trajetu ne’ebé Ministériu Finansa fó ba Autoridade Aduaneira mak rekolla reseita iha kada tinan ho millaun $72.

Iha tinan kotuk, husi janeiru-17 dezembru 2018, AA rekolla reseita hamutuk millaun $65-resin.

Aléinde ne’e nia mós dehan kona-ba sasán tama ilegál, Alfándega ho ekipa konjunta inklui instituisaun relevante sempre hala’o atuasaun, tantu akontese iha fronteira liuhosi tasi no rai-maran.

Maibé, tenke kontinua esforsu nafatin ho instituisaun relevante hotu atu kombate, la’ós AA mesak mas, tenke instituisaun integrada ne’ebé hola parte atu halo kontrolu ba importasaun no esportasaun.

Nia afirma atu halakon atividade ilegál, sei lori tempu ka prosesu naruk tanba haree ba Timor-Leste nia tasi no fronteira terrestre ne’ebé luan, limitasaun rekursu, finanseira, ekipamentu no kondisaun ekonomia rai-laran sei fraku, entaun ema bele halo aktu ilegál sira ne’e.

Jornalista : Zezito Silva

Editora : Maria Auxiliadora

HAKEREK NO HATÁN

Please enter your comment!
Please enter your name here