Diretór Jerál Servisu Migrasaun Foun Superintendente Polisia Agostinho Gomes (liman loos) kaer liman ho diretor Imigrasaun sesante, Sperintendente Xefe Boavida Ribeiro. Imajen/MI

DILI, 18 setembru 2019 – Servisu Migrasaun koopera ho embaixada Indonézia, deporta ona sidadaun Indonézia na’in 12 iha fulan-agostu foin lalais ne’e, tanba uza vistu turista servisu ho ilegál iha Timor-Leste (TL).

Diretór Jerál Servisu Migrasaun, Superintendente Polísia Agostinho Gomes, haktuir dadus 2018 hosi Departamentu Operasaun Servisu Migrasaun identifika estranjeiru hamutuk 1078 maka uza vistu turista servisu iha TL.

“Kontinua halo investigasaun ba sidadaun estranjeiru ne’ebé ami identifika mosu irregularidade, barak uza vistu turista hala’o atividade profisionál ne’ebé ami aplika ona multa ba sira ne’ebé kontra lei migrasaun”, afirma Agostinho Gomes ba jornalista sira iha Vila-verde, ohin.

Servisu Migrasaun iha 2018 rejista sidadaun Indonézia serbisu ilegál iha TL ho númeru 638, Xinés 253, Filipina 80, Bangladexe 15, Srilanka 6, Índia 16, Malázia 10, Kamboja 8, Vietname 12, Myanmar 8, Brazíl 5, no Pakistaun 4.

Husi totál númeru ne’e infratór ba ema na’in 81, mane 60 no feto 21 tenke abandona voluntáriamente husi prazu loron 10 hodi sai husi territóriu tanba la selu multa.

Tuir lei migrasaun, infratór sira ne’ebé serbisu no loke kompañia privadu tenke selu multa ba estadu ho osan montante $250 too $1000. Enkuantu kompañia ne’ebé emprega traballadór rai li’ur tenke selu multa $750 kada traballadór.

Lei númeru 9/2003 no lei númeru 11/2017 fó kompeténsia ba Serbisu Migrasaun halo kontrolu no fiskaliza sidadaun estranjeiru ne’ebé hela no sai husi territóriu.

Servisu Migrasaun mós hein hela atu implementa vistu livre ba sidadaun Indonézia ho durasaun fulan ida ne’ebé sei implementa, hafoin Governu publika iha Jornál da Repúblika.

Jornalista          : Eugénio Pereira

Editór                : Francisco Simões

HAKEREK NO HATÁN

Please enter your comment!
Please enter your name here