Diretór Ezekutivu CNC, Hugo Fernandes. Imajen/Antonio Goncalves.

DILI, 18 Setembru 2019 (TATOLI) – Diretór Ezekutivu Sentru Nasionál Chega (CNC, sigla portugés), Hugo Fernandes, hatete CNC iha programa prioridade ne’ebé atu halo liuhusi orsamentu tinan oin mak halo mapeamentu ba fatin istóriku sira no prepara kondisaun ba arkivu.

Nune’e mós halo enkuadramentu legál ka lei no produsaun kurríkulu atu hanorin iha eskola sira iha territóriu Timor-Leste.

“Ita iha arkivu barak la halimar, maibé laiha kondisaun atu rai sasán sira ne’e no dezenvolve kurríkulu ba eskola liuliu ba ensinu primáriu no sekundáriu inklui universidade sira”, Hugo Fernandes informa hafoin aprezenta proposta orsamentu ba Komité Revizaun Polítika Orsamentu (KRPO) iha Ministériu Finansa, ohin.

Diretór Ezekutivu CNC ne’e dehan orsamentu ba CNC avansa ho pakote millaun $2.393. “Iha 2020, ita husu osan millaun $2.393, maibé presiza buat balun diskute iha ekipa téknika tanba ami husu atu sosa karreta mini bus rua. Ita-nia Primeiru-Ministru hateten ona la hola karreta iha tinan oin, ne’ebé karik iha redusaun”.

Iha aprezentasaun orsamentu, Hugo Fernandes, relata hetan apresiasaun husi KROP no fó apoia tomak atu kontinua prezerva fatin istóriku sira iha Timor-Leste.

Iha tinan oin, CNC koopera ho Ministériu Edukasaun, Juventude no Desportu halo produsaun barak liután ba livru sira atu sai kurríkulu ba eskola liuliu iha matéria istória no direitu umanu inklui sidadania no mós módulu formasaun ba membru Forsa Armada ho PNTL sira.

Planu foun, nia dehan, CNC kontinua apoia ba nasaun sira ne’ebé hakarak aprende rekonsiliasaun Timor-Leste nian hanesan Aceh-Indonézia, Kolómbia no Bangsamoro iha Filipina, inklui iha nota entendimentu ho nasaun g7+  atu apoia ba Iemen, Sudaun Súl no Vietnam, ne’ebé mak agora mós hakarak sai membru g7+.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here