António Ai-Tahan Matak ho nia membru CPD-RDTL sira akompaña julgamentu ba kazu ne'ebé iha relasaun ho Matebian Mauk Moruk iha TDD, kuarta (18/09/2019). Imajen/Domingos Piedade

DILI, 18 setembru 2019 (TATOLI) – Eis Membru CPD – RDTL husi munisípiu 12, inklui Rejiaun Administrativu Espesiál Oekusi (RAEOA), ohin okupa resintu Tribunál Distritál Dili (TDD) hodi akompaña julgamentu no rona leitura akórdaun ba kazu ne’ebé envolve Koordenadór Jerál CPD-RDTL, António Ai-Tahan Matak.

Membru CPD-RDTL sira marka prezensa iha TDD, kuarta (18/09/2019). Imajen/Domingos Piedade

Iha kazu ne’e Ministériu Públiku notifika António Ai-Tahan Matak, Angela Freitas ho membru CPD-RDTL sira seluk tan, hanesan arguidu tanba halo movimentu semi militár no lidera organizasaun CPD-RDTL ne’ebé nia ezisténsia ilegál no fó apoiu ba grupu Konsellu Revolusaun Maubere (KRM) ne’ebé lidera husi matebian Paulino Gama Mauk Moruk.

António Ai-Tahan Matak,  informa membru CPD-RDTL nia prezensa iha tribunál la’ós atu halo asaun, maibé simplesmente hakarak atu rona akórdaun finál husi tribunál. Maske nune’e, ohin tribunál la konsege hasai desizaun ruma tanba juis kaer prosesu José Maria de Araújo destaka fali ona ba tribunál distritál Suai. Ho nune’e, prosesu kontinua fali ba loron  23 outubru 2019 ho tuku 14.30.

Iha biban hanesan, defeza husi arguida Angela Freitas, Rui António Mendonça mós informa nia kliente Angela Freitas koopera nafatin tribunál hodi too rona desizaun finál no garante katak iha Ministériu Públiku mós la komprova prova ruma hasoru nia kliente no husu absolvisaun mak husu parte defeza mós konkorda ho desizaun ne’e.

Audiénsia julgamentu nee, prezide husi juis José Maria de Araújo, no arguida Angela Freitas hetan asisténsia legál husi advogadu privadu, no arguido sira seluk hetan asisténsia legal husi defensór públiku.

Jornalista : Domingos da Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here