Vise-Ministru Administrasaun Estatál Abílio José Caetano. Imajen/Antonio Goncalves

DILI, 18 setembru 2019 (TATOLI)-Ministériu Administrasaun Estatál (MAE) husu tan proposta adisionál ba osan millaun $30 ba iha Komisaun Revizaun Orsamentu iha polítika Orsamentu Jerál Estadu (OJE) 2020, hodi prepara kondisaun infraestrutura, rekursu umanu, estrutura munisipál  hodi implementa  polítika desentralizasaun administrativa no podér lokál  iha munisípiu hotu.

Pedidu adisionál ne’e MAE hato’o diretamente husi Vise Ministru MAE, Abílio José Caetano iha aprezentasaun OJE 2020 MAE nian ba Komité Revizaun Orsamentu iha Ministériu Finansa, tersa (18/09/2019).

“Proposta adisionál ne’e ba tinan oin ita prevee  ba prioridade sira presiza atu reforsa estrutura  no  infraestrutura Munisípiu nian no presiza kapasitasaun rekursu umanu iha munisípiu,” afirma Abílio José Caetano.

Governu da ualu ne’ebé lidera husi  Primeiru-Ministru Taur Matan Ruak iha kompromisu atu kontinua desentraliza serbisu administrasaun no podér lokál ba Autoridade Munisipál durante mandatu tinan lima 2018-2023.

Abílio José Caetano, klarifika katak, bainhira governu kria ona kondisaun mínimu ba Munisípiu 12  maka sei  halo transferénsia podér dala ida de’it   ba Prezidente Autoridade ho ninia estrutura iha territóriu.

Governante ne’e informa katak tuir planu iha tinan oin governu sei halo avaliasaun ba kondisaun mínimu hotu ne’ebé la’o ona iha Munisípiu 12.

Mezmu Komisaun Revizaun Orsamentu Polítika simu ona proposta adisionál husi MAE ne’e, maibé parte rua sei halo diskusaun profunda hodi analiza montante ne’e atu labele afeta ba ezekusaun OJE 2020.

Ministériu Finansa fó ona tetu fiskál ba MAE ho montante  millaun $5-resin hodi ezekuta ba saláriu vensimentu, bens serbisu, kapitál menór no transferénsia públika.

Ezekusaun OJE 2019 ba MAE daudaun ne’e,  atinje ona porsentu 64 husi total millaun $22.483 ba saláriu vensimentu, bens serbisu no transferénsia públika.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here