Inan no estudante sira partisipa iha sosializaun kona-ba moras kankru. Imajen Mídia PR

ATAÚRO, 18 setembru 2019 (TATOLI) – Espoza Prezidente Repúblika, Cidália Nobre Guterres, hamutuk ho Doutór Espesialista Sirúrjia, Alito Soares, hala’o sosializasaun kona-ba Kankru-Susun ba inan-feto no estudante ensinu sekundária iha Postu Administrativu Ataúro, Munisípiu Dili, ohin.

Sosializasaun ne’e importante tebes hodi esplika ba inan-feto no estudante adultu sira atu hatene kona-ba kankru-susun.

Kankru-susun, hanesan kankru ne’ebé mosu iha ema-nia glandula-susun. Númeru moras kankru ne’ebé aas tebes ba feto iha mundu, tuir dadus Timor-Leste ema ne’ebé diagnosa ba kankru-susun hamutuk 345.

“Tuir dadus iha Timor-Leste, kankru-susun ne’e iha númeru aas tebes. Balun agora konsulta ona no balun mate. Tanba ne’e, husu nafatin ba komunidade, la’ós iha Atauro de’it, maibé fó atensaun ba família sira liliu inan-feto sira para hatene hakbesik ba fasilidade saúde sira hodi hetan tratamentu hosi médiku sira”, Doutór Alito esplika.

“Ha’u-nia mensájen ba inan-feton sira, ita tenke hatene-aan atu halo ezaminasaun ka kuidadu rasik ita nia-aan, ba foinsa’e sira atu labele moe ka taka-aan liu no husu família sira atu tau atensaun ba malu hodi tau atensaun ba ita nia-aan. Tanba ne’e, karik iha síntoma ruma tenke lori ba parte saúde,” inan-nasaun ne’e apela.

Doutór Espesialista Alito Soares, hatutan, moras kankru-susun dala barak afeta tanba fatór jenétiku no afeta liu-ba feto sira ho %99, inklui mane ho pursentu ida. Iha Timor-Leste, kankru-susun komesa ona hosi adultu idade tinan 18 to’o 25. Kompara ho nasaun seluk, inan-feto sira idade tinan 40 ba leten mak afetadu.

Tanba ne’e, Doutór Espesialista husu ba inan-feto no juventude Ataúro-oan atu labele moe hala’o tratamentu. Bainhira iha síntoma ruma hanesan, primeiru,  kafuak ki’ik-oan mosu iha susun no kalilin la moras ho medida ne’ebé la hanesan. Segundu, susun kulit namkurut hanesan sabraka kulit. Terseiru, susun-matan dada-aan tama no dalaruma sai been koor mutin, kinur no dalaruma kahur ho raan. Kuartu, kanek nakloke iha susun ne’ebé susar atu kura, akompaña mós ho sinál seluk hanesan ruin moras, isin tuun no bubu iha kalilin.

Doutór Espesialista husu ba feto ho idade tinan 18 ba leten atu halo ezaminasaun rasik ba susun dala ida kada fulan.

Iha sosializasaun ne’e, partisipa másimu hosi Autoridade Postu Administrativu Ataúro hanesan parte saúde, edukasaun, seguransa no estudante sira.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here