Kontra-atake entre jogadór Boavista Timor FC no Académica FC iha Estádiu Munisipál Dili, ohin. Imajen Mídia LFA

DILI, 18 setembru 2019 (TATOLI) – Boavista Timor FC susesu hadau billeti hakat ba jogu semi finál Tasa 12 Novembru époka 2019 hafoin halakon Académica FC ho golu 2-1 iha Estádiu Munisipál Dili, kuarta ne’e.

Golu vitória Boavista marka hosi jogadór Anguiso Barbosa iha minutu 3, Edit Sávio 26 no golu úniku Académica hatama hosi Hasan Ramos iha minutu 39.

Derrota ne’ebé Académica hetan lori ekipa ne’e haksumik-aan ona hosi jogu Tasa 12 Novembru basá sistema jogu refere lakon-sai ka bota fora. Enkuantu, Boavista hela hakmatek ona hodi hein fali Assalam FC no Lalenok United FC ne’ebé mak sei joga iha semana mai ne’e.

Entretantu, aban (19/9), sei iha mós jogu entre ekipa Lika-Lika Lemorai FC Vs AD SLB hodi hadau malu sé mak manán hakat ona ba finál hodi hein ekipa hirak ne’ebé sei joga semana mai ne’e.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here