Diretór Ezekutivu Fundasaun Mahein, João Almeida ho Kordenador Peskiza, Sancho Xavier. Imajen/Eugénio Pereira

DILI, 17 setembru 2019 (TATOLI)-Organizasaun Naun Governmental Fundasaun Mahein (FM) husu ba Ministériu Interior  atu loke investigasaun tantu disiplinár no kriminál ba  oknum Funsionáriu Migrasaun sira ne’ebé komete iha irregularidade.

Diretór Ezekutivu Fundasaun Mahein Interinu, João Almeida dehan, FM konkorda ho medida ne’ebé Ministériu Interior foti hodi hadi’a situasaun sira iha Servisu Migrasaun nian no daudaun ne’e halo ona transferénsia ba pesoál Servisu Migrasaun sira husi PNTL fila ba PNTL. Maibé, FM husu mós tenke halo uluk investigasaun profunda ketak ida ba pesoál sira ne’ebé deskonfia komete irregularidade.

Liu husi konferénsia imprensa, ohin, iha Edifisiu FM, João Almeida, afirma, investigasaun kle’an importante hodi hatene oknum se maka envolve iha kazu, foin governu bele foti medida halo transferénsia ba oknun funsionáriu sira para hadi’a sistema Servisu Migrasaun nian.

FM preokupa ho atuasaun Servisu Migrasaun nian iha territóriu nasionál liu-liu iha postu fronteira, aeroportu no portu. Iha Abril 2019 Ministru Interior Interinu Filomeno da Paixão de Jesus hato’o ona lamentasaun kona-bá irregularidade iha prosesu aplikasaun vistu husi Servisu Migrasaun durante tinan 2016 to’o 2018 liu-liu iha postu fronteira Batugade.

Situasaun ne’ebé temi liu daudauk ne’e, Inspetór Jerál Estadu (IJE) nian mós halo ona investigasaun no konklui ona nia relatóriu iha loron 6 Agostu 2019.

Iha ne’ebé identifika problema barak mak mosu hanesan;

1). Pasaporte sidadaun Indonézia nian barak ne’ebé iha karimbu data entrada maibé laiha ka lataka vinheta de visto chegada, no laiha vistu seluk (komún traballu no rezidente) ne’ebé valida karimbu entrada sira refere.

2). Eziste utilizasaun vistu uzadu (vistu anterior) barak ba pasaporte sidadaun Indonézia nian balu tanba iha dupla aplikasaun karimbu data entrada, dupla utilizasaun vinheta de visto no utiliza resibu pagamentu vistu hodi taka netik ka haksumik data entrada real vistu nian.

3). Eziste inkoerénsia iha data utilizasaun visto entre dokumentu pasaporte ho livru jerál ba arkivu no livru termu entrega vistu nian no. 4), Eziste irregularidade iha prosesu kontrolu ba aplikasaun karimbu data entrada iha dokumentu pasaporte sidadaun Indonézia nian balu.

João Almeida hatutan, iha relatóriu, monitorizasaun FM nian identifika mós iha Postu Fronteira Bobometo- Oe-Cusse orsamentu no taxa lakon ka la hatama ba banku husi fulan Jullu too Agostu 2019 nian ho montante rihun $4,230.00. Deskonfia, pesoál Servisu Migrasaun utiliza ba nesesidade privadu.

“Ami mós identifika pesoál Serbisu Migrasaun Postu Fronteira Bobometo ho Oe-Cusee uza rihun $4,230.00 ba ninia nesesidade privadu, ida ne’e presiza iha investigasaun,” João Almeida hatete.

Ho problema hirak ne’ebé identifika iha leten ne’e, Ministériu Interior hasai ona desizaun halo transferénsia ba pesoál Serbisu Migrasaun sira husi membru PNTL destakadu iha Serbisu Migrasaun nian. Nune’e Serbisu Migrasaun daudaun ne’e loke ona vaga ba pesoál PNTL sira na’in 50 atu destaka iha Serbisu Migrasaun hodi substitui pesoál sira ne’ebé transfere fila ona ba PNTL.

FM nia haree medida transferénsia urjente ne’ebé Ministru Interior Interinu no Diretór Jerál Servisu Migrasaun aplika daudaun la ho investigasaun ida kle’an no transferénsia urjente ne’e prejudika funsionamentu regulár Servisu Migrasaun nian. Tanba halo uluk tiha transferénsia ba pesoál Servisu Migrasaun nian hafoin halo rekrutamentu. Signifika katak funsionamentu Servisu Migrasaun nian daudaun ne’e mamuk ka paradu.

La Tolera Korrupsaun Mosu

Relasiona ho kazu ne’e, Ministru Defeza no Ministru Interior Interinu, Filomeno da Paixão de Jesus, deklara nia sei la tolera atu mosu korrupsaun iha Serbisu Migrasaun Timor-Leste.

“Ha’u sei opta radikasaun ba korrupsaun iha fatin ida ne’e. Ha’u mai aplika polítika VIII Governu Konstitusionál nian ho fuan no laran, hakarak diminui aktu sira ne’ebé la merese atu mosu iha fatin ida ne’e, hodi hataan ba pergunta oi-oin husi komunidade nia matan kona-ba servisu Migrasaun ninian,” dehan Ministru iha diskursu bainhira abertura Formasaun dahuluk Kona-ba Prosedura Servisu Migrasaun ba Adidu no Xefe Sesaun servisu Migrasaun, iha salaun enkontru Vila-Verde, Díli loron 9 setembru 2019.

Tuir dekretu Lei No. 31/2008 de 13 de Agostu Orgánika Ministériu Defeza no Seguransa orienta ona Serbisu Migrasaun hanesan entidade ketak ida husi PNTL.

Iha ne’ebé antes ne’e Serbisu Migrasaun hanesan parte integrante ida husi estrutura PNTL nian hanesan Departamentu Imigrasaun. Nune’e iha tinan 2009 revizaun ba Orgánika PNTL nian la konsidera ona Migrasaun hanesan departamentu PNTL nian. Ho ida ne’e Dekretu Lei No. 30/2009 Orgánika Serbisu Migrasaun nian separa ona Serbisu Migrasaun husi PNTL no hanesan entidade ketak ida tutela ba Ministériu Interior.

Serbisu Migrasaun hanesan serbisu seguransa ida ne’ebé diretamente subordinadu ba Ministériu Interior, iha kuadru polítika seguransa interna no iha termu sira lei migrasaun no azilu, iha objetivu fundamental kontrola sirkulasaun ema nian iha fronteira, hela no atividade ema rai-li’ur sira nian iha territóriu nasionál.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here