Diretór Ezekutivu Fundasaun Mahein, João Almeida. Imajen/Eugénio Pereira

DILI, 17 setembru 2019 (TATOLI)- Organizasaun Naun Governmental Fundasaun Mahein (FM) husu ba Primeiru-Ministru, Taur Matan Ruak, ho Konsellu Ministru, atu diskute ona mandatu Xefe Estadu Maiór Jenerál FALINTIL-FDTL, Majór Jenerál Lere Anan Timur, ho Vise Xefe Estadu Maiór Jenerál, Brigadeiru Jenerál, Falur Rate Laek, ne’ebé sei termina iha Outubru, tinan ne’e.

“Ami husu atu Governu no Prezidente Repúblika tenke hahú ona prosesu diskusaun ba mandatu Xefe Estadu Maiór Jenerál FALINTIL- FDTL, Major Jenerál Lere Anan Timur  ho Vise Xefe Estadu Maiór Jenerál, Brigadeiru Jenerál, Falur Rate Laek, ne’ebé sei remata iha Outubru ne’e,”  hateten Diretór Fundasaun Mahein, João Almeida, ohin, ba jornalista iha edifísiu FM, Fomento, Dili.

FM rekomenda ba membru Konsellu Superior Defeza no Seguransa sira atu hala’o reuniaun para diskute lista naran kandidatu foun ou kontinua fó fiar ba komandante antigu rua ne’e. Tanba Lei Orgánika no Estatutu F-FDTL haree husi idade Komandante Lere no Falur nia pasa ona ba reforma.

Fundasaun Mahein haree katak, iha lider jerasaun foun barak maka iha ona kapasidade atu lider Komandu F-FDTL, maibé atu nomeia ona tuir FM nia haree, ne’e depende ba kompeténsia Prezidente Repúblika, Francisco Guterres Lú Olo hodi konsulta ho membru Konsellu Superior Defeza no Seguransa.

Antes ne’e, iha 3 Agostu 2019 nia laran, Prezidente Repúblika, Francisco Guterres Lú Olo, dekreta kontinuidade mandatu ba Majór Jenerál, Lere Anan Timur nu’udar Xefe Estadu Maiór Jenerál F-FDTL, liu husi Dekretu Prezidensiál ne’ebé publika iha 14 juñu 2019, serie I, númeru 23 A, hahú sura husi 6 Outubru 2018.

Antes ne’e mós, molok Lere remata iha 6 Outubru 2018, Xefe Estadu Konsulta ho Konsellu Superior Defeza no Seguransa hodi rona hanoin husi ninia membru sira.

Hafoin mandatu Lere Anan Timor remata tinan rua nian (2015-2017), nu’udar Komandante Superiór Forsa Armada, PR renova ninia mandatu husi 6 outubru 2017 too 6 outubru 2018.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here