Advogadu privadu kompañia Marino Entreprise, Pedro Aparício. Imajen/Hortençio Sanchez

DILI, 17 setembru 2019 (TATOLI) – Advogadu Privadu kompañia Marino Enterprise, Pedro Aparício husu ba líder Nasionál, Kay Rala Xanana Gusmão, atu sai de’it árbitru hodi rezolve problema rai área Kaitehu.

Advogadu ne’e halo ona karta ida hodi haruka ona ba eis Primeiru-Ministru, Xanana Gusmão.

“Ha’u konsidera ita-boot hanesan Maun-Boot ba ita-nia rai ne’e, hanesan ami-nia aman, no hanesan ami-nia erói iha rai ida ne’e, ho laran luak, ha’u husu ita-boot rona netik ha’u nia kliente nia halerik no hamoos netik ha’u-nia kliente nia matan-been hodi sai Mediadór ka árbitru iha kazu refere”, dehan Advogadu Pedro Aparício iha karta ne’ebé nia hato’o ba Xanana Gusmão, tersa ne’e.

Nia hatutan: “Ami sei entrega kazu ne’e ba ita-boot nia liman hodi desidi tuir ita-boot nia fuan ho laran no hafoin rona tiha ami-nia parte no parte China Harbour”.

Advogadu ne’e konsidera, hahú hosi 9 setembru 2019 to’o agora, rai ho luan 19. 000 M² ne’ebé lokaliza iha aldeia Mota Ikun, Suku Mota Ulun, Postu Administrativu Bazartete, Munisípiu Liquiçá, sai polémika boot iha Timor-Leste tanba intervensaun hosi Xanana.

“Rai ne’e sai polémika tanba ita-boot rasik mak halo intervensaun, tanba ita-boot mai ho argumentu interese Estadu”, nia tenik.

Nia dehan, rai refere konsidera hanesan rai privadu hosi ninia kliente, Edencio Soares ka na’in kompañia Marino Enterprise.

Pedro Aparício subliña, Kompañia China Harbour mak utiliza tiha rai privadu ne’e hodi tau nia mákina boot dulas fatuk ho intensaun atu halo obra Portu Tibar.

“Problema ne’e iha polémika tanba iha ona desizaun hosi Tribunál Distritál Dili ne’ebé hasai iha 29 agostu 2019 liubá, maski iha ona Tribunál nia desizaun maibé defaktu ba ita-nia komunidade sei hamosu dúvida boot iha ita-nia rai tanba ita-boot halo intervensaun iha prosesu ida ne’e”,  nia katak.

Pedro haktuir, antes Marino Enterprise hatama kazu refere ba Tribunál, sira tenta hasoru malu ho Xanana Gusmão maibé la-konsege.

“Ikus mai desizaun Tribunál hasai tiha, a-favór mai ami, maibé konsekuénsia hosi desizaun ne’e fó impaktu boot mai ita-nia rai, tanba iha sosiedade nia leet mosu pro no kontra ba problema ne’e. Ddurante ne’e ita-boot rona de’it informasaun unilaterál hosi kompañia China Harbour hodi ita-boot ho interese Estadu nian halo intervensaun hodi kontra deszaun Tribunál nian,” nia dehan tan.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here