Sesaun plenária Parlamentu Nasionál. Imajen dok. Tatoli

DILI, 16 setembru 2019 (TATOLI) – Parlamentu Nasionál (PN), segunda ne’e, la autoriza Prezidente Repúblika (PR), Francisco Guterres Lú Olo ba partisipa Simeira kona-ba Asaun Klimátika no Sesaun Asembleia Jerál Organizasaun Nasaun Unida nian ba dala-74.

Tuir ajénda ne’ebé ida, Simeira Asaun Klimátika ne’e realiza iha loron 23 setembru no Asembleia Jerál ONU nian hahú iha loron 24 to’o 30 setembru 2019.

Lee mós: PN La Autoriza Dezlokasaun PR Ba Estranjeiru

Prezidente Parlamentu Nasionál, Arão Noé de Jesus da Costa Amaral, hateten dezlokasaun Xefe Estadu nian ba rai-li’ur tenke hetan autorizasaun hosi Parlamentu.

Molok tama ba votasaun, Deputadu KHUNTO, Luís Roberto, afirma Prezidente Repúblika tenke rezolve lai impase polítika iha rai-laran, liliu ba ema na’in-sia (9) ne’ebé to’o oras ne’e kontinua pendente.

“Molok viajen ba rai-li’ur tenke hadi’a lai ita-nia uma laran. Se buat sira ne’e rezolve ona, Prezidente Repúblika bele ba ne’ebé de’it, laiha problema”, dehan Luis Roberto, liuhosi plenária, iha Parlamentu Nasionál.

Deputadu sira seluk, tantu Bankada Governu no Bankada Opozisaun, la halo intervensaun kona-ba viajen Xefe Estadu nian, hein hiit de’it kartaun.

Tanba ne’e, iha nia intervensaun, Prezidente Parlamentu Nasionál, Arão Noé, hateten Deputadu sira seluk la hato’o deklarasaun polítika, entaun hakat ba votasaun.

Rezultadu votasaun a-favór 20, kontra 27 no abstensaun 1. Viajen PR Lú Olo nian kanseladu.

Hafoin votasaun, Deputada Bankada FRETILIN, Josefa Soares, konsidera argumentu Deputadu Luís Roberto nian laiha fundamentu.

“Ne’e la’ós fundamentál atu tau iha polítika ida di’ak. Nunka bele hanesan ne’e. Kuandu ita halo polítika di’ak, buat ne’ebé relasaun ho internasionálmente ita nunka bele kahur ho ita-nia problema internu nasaun nian, tanba ne’e la’ós ba reuniaun hanesan babain. Ne’e ba tuir reuniaun iha Organizasaun Nasaun Unida”, dehan Deputada Josefa ba jornalista sira.

Nia dehan, ema bele ko’alia saida ba Timor-Leste nia partisipasaun iha nível internasionál, tanba ne’e la’ós primeiravez, maibé beibeik ona.

“Entaun, internasionálmente, ema hanoin saida ba ita. Seráke tanba ita-nia problema internu mak ita impata?  Problema internu la’ós de’it Prezidente Repúblika mak tenke rezolve ida ne’e. Tuur hamutuk mak bele rezolve. Fila-fali ba Governu mós tenke hatene ida ne’e”,  kestiona deputada Josefa.

Nia hateten, atu solusiona impase polítika tenke diálogu.

Purtantu, Deputadu CNRT, Patrocínio Fernandes, informa reprezenta Estadu Timor-Leste ba iha rai-li’ur Ministru Negósiu Estranjeiru no Kooperasaun mós bele.

“Tanba Prezidente Repúblika hanesan aman ba nasaun, hanesan mós Xefe Estadu kuandu instituisaun sira la’o inkompletu hela, entaun di’ak liu ita rezolve uluk lai depois mak ita ba. Se ita-nia problema iha rai-laran la rezolve, ita atu lori  Estadu nia naran atu halo saida iha ne’ebá”, dehan deputadu CNRT ne’e.

Nia subliña, Governu liuhosi Ministériu Negósiu Estranjeiru no Kooperasaun  (MNEK) bele asumi responsabilidade polítika tomak nian no bele reprezenta Estadu ba ONU.

“Prezidente Repúblika ninia auzénsia iha ne’ebá ne’e sei la fó prejuizu ba Estadu ne’e, ne’ebé Prezidente Repúblika la fó impaktu ida”, Patrocínio tenik.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here