Prezidente TATOLI. I.P, José da Costa. Imajen Tatoli/Egas Cristóvão.

DILI, 16 setembru 2019 (TATOLI) – Prezidente Ajénsia Notisioza Tatoli, Institutu Públiku (TATOLI.IP), José da Costa, informa orsamentu 2019 kompara ho 2020 hetan redusaun kuaze porsentu 18 (orsamentu atuál 2020 divide ba orsamentu anteriór 2019 no multiplika ba 100) tuir polítika ne’ebé Tatoli iha.

José da Costa friza katak orsamentu iha 2019 hetan rihun $649 no tinan oin iha de’it rihun $533.104, maibé ida ne’e maka orsamentu ne’ebé fó hosi Sekretaria Estadu Komunikasaun Sosiál (SEKOMS).

“Atu halo redusaun ka lae, ida ne’e la kestaun, maibé importante maka atu halo saida”, José da Costa ba Ajénsia Tatoli iha nia serbisu fatin, Palásiu Governu, ohin.

Tuir José da Costa iha 2020, Tatoli iha orsamentu atu harii edifísiu. “Ha’u bele imajina katak se laiha orsamentu ba edifísiu karik parese orsamentu mantén ka bele sa’e liután”.

“Atu haree tetu orsamentu ho pakote katak se ita halo kalkulasaun karik millaun $9 garantidu mais millaun $4.3. Ho konsiderasaun hirak ne’e hotu maka parese sira deside katak di’ak liu ho natoon atubele utiliza”, katak tan.

Ba tinan oin, konforme pakote ne’ebé iha, transferénsia públika kuaze millaun $1.9. Hosi osan ne’e Rádiu Televizaun Timor-Leste, Empreza Públika (RTTL,E.P) hetan millaun $1 no Tatoli hetan rihun $533.104.

Nune’e, tinan oin Tatoli tama ona faze atu jere osan rasik, orsamentu la hanesan ho tinan ne’e, liuhosi tratamentu iha diresaun, maibé muda ona rubrika ida hanaran transferénsia públika.

Konforme projesaun ne’ebé iha katak totál orsamentu ne’ebé prepara hodi harii edifísiu, RTTL,E.P inklui torre, nune’e mós edifísiu Ajénsia Tatoli nian, totál orsamentu ba estabelese infraestrutura hamutuk millaun $9.

José da Costa haktuir, tinan oin, Tatoli hakarak evoluidu. ”Signifika tinan ne’e ita haree ba fasilidade no ekipamentu no tinan oin hahú haluan liután kobertura, bele permite atu halo publikasaun multimédia, multikanál no seluk tan, expansaun konteúdu língua, ita hakarak iha ona porsentu 50 iha lian inglés no portugés”.

Seluk tan maka dezeñu ba edifísiu Tatoli seidauk hahú, maibé preparasaun termu referénsia konkluidu entrega ona ba Ajénsia Dezenvolvimentu Nasionál (AND) no sei haree hafoin hahú halo estudu viabilidade.

Tanba tuir regra normál tenke hahú ho estudu hafoin finaliza dezeñu, maibé preparativu hirak ne’e la’o di’ak nafatin. Dezeñu prelimináriu tuir versaun SEKOMS ho ekipa.

Prosesu normál kuandu tama iha estudu hafoin halo konkursu atu kompañia ne’ebé kaer bele serbisu, hein katak tinan oin bele hahú ona.

Konforme espetativa SEKOMS nian hakarak hahú ona ho primeira pedra, entaun projesaun ne’e 2020 ho 2022 nia rohan konstrusaun hotu ona. Tuir planu, fatin ba konstrusaun edifísiu Tatoli sei halo iha parte Ai-Mutin.

Notísia relevante : SEKOMS nia Proposta Orsamentu iha 2020 Millaun $13,3

Jornalista : Zezito Silva  

Editora : Maria Auxiliadora        

HAKEREK NO HATÁN

Please enter your comment!
Please enter your name here