DILI, 16 setembru 2019 (TATOLI) – Bankada Governu iha Parlamentu Nasionál (PN), husu Ministru Justisa, Manuel Cárceres, atu deskobre problema rai iha Kaitehu, Suku Mota Ulun, Postu Administrativu Bazartete, Munisípiu Liquiçá.
Xefe Bankada CNRT, Duarte Nunes, apoia deklarasaun Ministru Justisa hodi deskobre ‘mafia’ justisa.
“Ha’u husu señor Prezidente Parlamentu katak ita-nia komisaun ida ka rua tenke akompaña Ministru Justisa atu bongkar to’o iha ne’ebé prosesu, nune’e hatudu mafiozu sira ne’e ba iha justisa, para rai ne’e sees hosi mafia”, dehan Duarte Nune’e liuhosi plenária, segunda ne’e.
Notísia Relevante: Disputa Rai Kaitehu, MJ Promete Sobu “Mafia” Justisa
Tuir deputadu ne’e loloos problema rai iha Kaitehu ne’e ema individu mak hasoru Estadu.
“Instituisaun Estadu tenke defende estadu. Kuandu ema defende Estadu ita dehan ladi’ak, iha situasaun rua bele mosu, ita defende ema ne’e ou ita defende Estadu”, dehan nia.
Nia afirma, iha situasaun ne’e instituisaun Terra no Propriedade tenke defende Estadu, tanba kompañia China Harbour halo servisu tanba Estadu mak fó kontratu.
“Agora ita rame-rame ho Ministru Justisa duni tiha mafiozu sira nee”, Duarte Nunes.
La Presiza Ministru Tuun Direita
Deputadu Bankada KHUNTO, António Verdiál, hateten sorte líder nasionál, Xanana Gusmão sobu, selae públiku la hatene mafia ba problema rai iha Kaitehu, tanba intervensaun ne’e realístiku.
“Tuir lei númeru 1/2003, artigu 17, entidade kompetente ne’ebé ezekuta ordem mak Diresaun Nasionál Terra Propriedade (DNTP) no Servisu Kadastrál, maibé realidade orientasaun ne’ebé mai hosi superiór la halo tuir lei haruka, tanba ne’e mak buat sira ne’e sai baralladu hotu iha terrenu”, dehan António Verdiál.
Eis Diretór DNTP ne’e fó ezemplu, iha IV Governu Konstitusionál kuandu hala’o servisu Ministra Justisa, Lúcia Lobato la tuun direita.
“Ha’u nunka autoriza nia (Lúcia Lobato) atu ba sama-ain iha terrenu, bainhira iha terrenu ofisiál sira mak rezolve”, haktuir deputadu ne’e.
Nia esplika, atu rezolve kestaun disputa rai iha parte administrativa no tenke haree hosi aspeitu ekonomia, sosiál, polítika, kultura, defeza no seguransa.
“Tanba ne’e ha’u husu VIII Governu Konstitusionál, favór boot ida servisu ne’e tenke integradu, servisu ne’e tenke halo tuir lei haruka, la’ós mai uza fali personalidade hanesan autoridade polítiku”, nia akresenta.
Parte seluk, Deputadu FRETILIN, Antoninho Bianco, fó hanoin katak Ministru sira tenke halo servisu ho profísional la’ós halo servisu polítiku iha terrenu.
Deputadu FRETILIN ne’e preokupa deklarasaun Ministru Justisa tanba atu kebra mafia.
“La hatene mafia saida kona-ba disputa rai ne’e”, dehan nia.
Deputadu opozisaun ne’e konsidera, desizaun Tribunál mak vale liu, enkuantu deklarasaun polítika ne’e la vale ida.
“See mak la konkorda halo rekursu ba desizaun Tribunál nian ne’e”, tenik Antoninho Bianco.
Jornalista: Evaristo Soares Martins
Editór: Xisto Freitas
