SEPS Husu Adisionál Millaun $4 Resin Atu Sosa Karreta Bombeiru
DILI, 13 setembru 2019 (TATOLI)-Sekretaria Estadu Protesaun Sivíl (SEPS) husu tan proposta orsamentu adisionál millaun $4-resin ba Komité Revizaun Polítika Orsamentu (KROP) hodi sosa karreta tolu ba Diresaun Bombeiru.
“Ami husu adisionál ba kapitál menór dezenvolvimentu ho fundu transferénsia públika hamutuk millaun $4-resin hodi sosa karreta bombeiru rua (2) no karreta tesi ai ida (1) ho multifunsaun,” hateten Sekretáriu Estadu Protesaun Sivíl Alexandrino Xavier Araújo, ba Ajénsia TATOLI, ohin, iha Dili.
Husi proposta adisionál ne’e, SEPS sei prevee montante balun hodi halo manutensaun ba karreta Bombeiru iha munisípiu hotu tanba daudaun ne’e maioria avaria ona.
Alende ne’e, planu sei loke tan diresaun serbisu Bombeiru iha Munisípiu Manatuto no Ermera iha tinan 2020.
Tuir tetu fiskál orsamentu Jerál Estadu (OJE) 2020 prevee montante millaun $9 ba saláriu no vensimentu no bens serbisu tanba ne’e husu tan adisionál millaun $4-resin.
“Ho orsamentu ne’e nia programa sei konsentra ba planu prioridade liuliu haree ba formasaun no mós rekonstrusaun infraestrutura,” Sekretáriu Estadu Alexandrino Xavier Araújo.
Kona-ba ezekusaun OJE 2019, nia esplika, husi valor orsamentu millaun $11 ne’ebé aloka ba SEPS to’o ohin ezekuta ona porsentu 70 husi diresaun haat ne’ebé tutela ba SEPS, mak hanesan Seguransa Patrimóniu Públiku, Bombeiru, Diresaun Nasionál Jestaun Dezastre Naturaís ho Prevensaun Konflitu.
Jornalista : Nelson de Sousa
Editór : Francisco Simões
