Diretor TradeInvest Timor-Leste, Arcanjo da Silva. Imajen/Antonio Goncalves.

DILI, 13 setembru 2019 (TATOLI) – Diretór Ezekutivu Ajénsia Promosaun no Investimentu TradeInvest Timor-Leste, Arcanjo da Silva, hatete iha reuniaun Komité Revizaun Orsamentu Polítika (KROP), TradeInvest la propoin orsamentu adisionál tanba tetu ne’ebé distribui ba sira iha tinan 2020 sa’e porsentu 10 husi orsamentu tinan ne’e (2019) mak millaun $1.100.

“Ami hetan envelope fiskál ba Orsamentu Jerál Estadu (OJE) 2020 hamutuk millaun $1,252 atu aloka ba ami-nia programa prioridade no atividade sira”, Diretór TradeInvest afirma iha Ministériu Finansa, Aitarak-Laran, ohin.

Nia salienta, aumentu porsentu 10 ne’e tanba KROP haree papél TradeInvest importante tebes atu halo diversifikasaun ekonomia no promosaun investimentu hodi kria postu traballu iha Timor-Leste.

“Iha tinan 2020, ami konsentra iha promosaun investimentu rai-laran no rai-li’ur atu diversifika ekonomia no kria empregu ba timoroan sira”, katak.

Programa prioridade ba TradeInvest iha tinan oin hala’o promosaun maka’as liu ba produtu lokál Timor-Leste atu hala’o esportasaun ba rai li’ur no promove setór potensiál turizmu, agrikultura no peska, indústria transformadora ba rai-laran no li’ur atu investidór sira bele mai investe iha Timor-Leste.

“Ita promove maka’as liu esportasaun entaun ita-nia produtu mak sai bá li’ur para ita bele importa dólar mai ita-nia rai hodi aumenta rendimentu ita-nia nasaun nia”, akresenta.

TradeInveste mós hakarak promove ema ka kompañia timoroan ne’ebé prodús sasán balun ho kualidade ne’e sei lori bá merkadu, liuliu fasilita esporta no fasilita halo dokumentu atu esporta ba rai-li’ur.

“Ami sei fasilita, promove,  akompaña  no monitoriza  atu ita-nia ema sira ne’ebé hakarak esporta nian sasán sira ne’ebé prodús iha Timor-Leste atu bá rai li’ur ne’e  mak ami nia servisu prinsipál iha tinan oin (2020)”, nia promete.

Atu loke investimentu ba setór privadu sira, nia dehan tinan oin Governu Singapura ho delegasaun Kámara Komérsiu Singapura hamutuk ho investidór sira atu investe iha Timor-Leste.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here