Koordenadór EBC Rumbia, Abílio Pereira da Conceição

DILI, 13 setembru 2019 (TATOLI)—Koordenadór Eskola Báziku Filiál Rumbia, Abílio Pereira da Conceição, ohin, informa tuir padraun ne’ebé Governu liuhusi Ministériu Edukasaun, Juventude no Desportu (MEJD) fó sai, loloos ne’e primeiru siklu to’o segundu siklu ne’e masimál alunu to’o de’it  240 alunu maibé agora sala neen (6) ne’e alunu iha tiha ona 715 alunu ho atividade ensinu aprendizajen iha sala aula hamutuk tornu tolu.

Tuir padraun MEJD nian katak kada sala aula iha eskola ida ninia volume alunu minimál tenke ema 40 de’it, maibé Eskola Ensinu Báziku Filiál Rumbia iha Caicoli ninia alunu kuaze ema 60 iha kada aula

“Se ita hanoin tan atu aumenta terseiru siklu ne’e problema boot alunu balun bele eskola iha tempu kalan. Maibé, ita lakohi ida ne’e atu akontese entaun ita mantein ho kondisaun ne’ebé iha ona,” dehan Koordenadór Eskola EBF Rumbia, Abílio Pereira da Conceição ba Ajénsia TATOLI liuhusi entrevista iha ninia kna’ar fatin, Caicoli, Dili, sesta (13/09/2019).

Tanba ne’e, nia hatutan, parte eskola lakohi atu hamosu polémika entre profesór ho inan-aman estudante sira nian entaun ita kontribui liuhusi retribuisaun ba rai na’in kada fulan alunu ida fó $1, rai ne’e ikus mai sosa de’it ho $800 hodi harii sala neen.

Haree ba kontrbuisaun sira ne’em, nia dehan, parte eskola fó nafatin prioridade hodi simu alunu sira maske fasilidade sala aula la sufisiente. Lolos ne’e kuandu espasu mak sei iha karik, eskola ne’e kompleta tiha ona no bele sai mós Eskola Báziku Central (EBC) ona.

Razaun, nia haktuir, parte eskola antes ne’e hatama proposta ba Ministériu Edukasaun atu aumenta tan sala aula, Governu aseita hodi haruka ekipa téknika mai peskiza ona tanba laiha ona espasu entaun la konsege halo tan.

“Ita-nia planta eskola EBF Rumbia ne’e loloos atu halo andar maibé bainhira Obras Publiku foti sampel rai ne’e lori ba halo teste iha laboratóriu, deteta rai ne’e la forsa atu aguenta pezu ka todan uma andar nia entun eskola ne’e hela hanesan ne’e de’it ona,” dehan nia.

Eskola EBF Rumbia, Postu Administrativu Vera Cruz, Munisípiu Dili, Suku Caicoli, ne’e harii iha 2000 to’o ohin loron sei mantein de’it ho segundu siklu ho razaun tanba espasu atu aumenta tan sala aula labele ona.

Entretantu nia informa, profesores sira ne’ebé haknaar-aan iha Esoka Báziku Filiál Rumbia hamutuk ema na’in 24 ne’ebé agora hela de’it ema na’in 17 tanba ema na’in rua (2) reformadu no ema na’in haat (4) fila hikas ba Maromak nia uman, mate ona. Eskola EBF Rumbia ne’e nu’udar ramu ida husi Eskola Baziku Central (EBC) Farol.

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here