Prezidente Parlamentu Nasionál, Arão Noé de Jesus da Costa Amaral. Imajen Egas Cristóvão

DILI, 12 setembru 2019 (TATOLI) — Prezidente Parlamentu Nasionál (PPN), Arão Noé de Jesus da Costa Amaral, husu ba Tribunál justifika desizaun hapara ke’e fatuk iha área Kaitehu hosi kompañia China Harbour.

‘’Ne’e kabe ba Tribunál tenke justifika fila-fali hodi hatene loloos desizaun ne’e saida. Dalaruma desizaun ne’e buat seluk ida, aplikasaun iha terrenu oin seluk. Ne’e bele akontese. Tribunál mak bele justifika para desizaun loloos ne’e saida, nune’e labele fó impaktu’’, dehan nia ba jornalista sira, iha Parlamentu Nasionál, kinta ne’e.

Lee mós: Ohin, DTP Liquiçá  Aprezenta Relatóriu Estatutu Rai Kaitehu Ba MJ

Nia haktuir, ne’e mak eis Primeiru-Ministru, Xanana Gusmão sente preokupadu, se desizaun ne’e impkatu maka’as ba prosesu konstrusaun projetu ida ne’e.

‘’Ita mós labele haluha haree kontratu ne’e iha nia impaktu katak se prosesu konstrusaun ne’e atraza, sei falla tanba estadu Timor-Leste mak la fasilita sei kona multa kada fulan. Númeru hira ha’u lakohi ko’alia, maibé ita iha kompromisu ida tanba kompañia presiza garantia ida hodi nia halo prosesu ne’e bele la’o lalais tuir kontratu ne’ebé iha’’, katak nia.

Nia konsidera intervensaun Xanana Gusmão ba rai iha Kaitehu interese Estadu nian.

‘’Katak, labele ho desizaun sira ne’e ita hapara prosesu ne’ebé fó impaktu fali ba povu ne’e rasik. Impaktu mak ita-nia atraza ba konstrusaun portu Tibar. Segundu, ita mós kona sansaun fó fali indeminizasaun ba ita-nia fallansu sira. Sei lori orsamentu Estadu mak selu. Entaun, preokupasaun Xanana Gusmão nian ne’e relevánsia para oinsá desizaun ne’e labele iha impaktu’’, katak nia.

Arão afirma, ne’e Tribunál nia kompeténsia maibé labele impaktu ba interese nasionál ka interese Estadu nian.

‘’Agora impede dezenvolvimentu ka lae, ita haree nia desizaun loloos. Ninia konteúdu ne’e, bele mós interpretasaun sala. Aplikasaun iha terrenu mak sala la tuir konteúdu desizaun nian, bele mós akontese ida ne’e. Tanba ne’e, Tribunál tenke justifika’’, tenik Prezidente Parlamentu Nasionál.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here