Xefe Departamentu Sinál no Tráfiku Diresaun Nasionál Transporte no Terrestre (DNTT), João Eugénio da Silva. Foto/Natalino Costa.

DILI, 12 Setembru 2019 ( TATOLI) – Xefe Departamentu Sinál no Tráfiku Diresaun Nasionál Transporte no Terrestre (DNTT) Ministériu Transporte no Komunikasaun, João Eugénio da Silva, hatete iha orsamentu 2020 DNTT planeia harii tan terminál pasajeiru iha Manleuna, postu administrativu Don Aleixo, Dili.

Nia dehan terminál ne’e sei estabelese iha loos merkadu Manleuana nia kotuk ne’ebé liga dalan foun nian.

“Ami tau ona orsamentu ba ida ne’e iha tinan oin, horisehik, ami-nia dirijente DNTT halo ona diskusaun hein katak planu orsamentu ba ne’e bele pasa atu nune’e terminál ne’e bele akumula pasajeiru husi Aileu, Ainaru, Same no Suai ne’ebé maka liu dalan foun Manleu nian”, dehan João Eugénio ba Tatoli iha Balidi, Ohin.

Rai ba konstrusaun terminál dezde uluk husi parte Ministériu Komérsiu, Indústria no Ambiente (MCIA) maka hola hodi fó ba DNTT atu halo terminál.

Aléinde ne’e, sobre muda terminál Bekora bá Hera, João Eugénio dehan husi autoridade munisípiu Dili identifika ona rai iha Halidolar-Hera nian no halo ona koordenasaun ho DNTT, maibé sei iha estudu kle’an iha área ne’e antes foti desizaun.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here