Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 12 setembru 2019 (TATOLI) – Prezidente Parlamentu Nasionál (PPN), Arão Noé de Jesus da Costa Amaral, preokupa ho desizaun Tribunál ne’ebé lais liu, kona-ba disputa rai iha Kaitehu, suku Mota Ulun.

Nia preokupa ho deklarasaun Diretór Terra Propriedade no Servisu Kadastrál Munisípiu Liquiçá, Tito Serrão da Silva, ne’ebé laiha koñesimentu.

“Ha’u admira oituan, prosesu kazu sivíl hanesan rai nian ne’e lais liu, ita bele dehan kazu krime sira pendente barak maibé kazu sivíl ida liga ba rai ne’e lais liu. Tanba ne’e ita tau pontu interrogasaun, ba deklarasaun Terra no Propriedade Liquiçá dehan sira deskoñese no lahatene prosesu ne’e”, tenik PPN ba jornalista sira iha Parlamentu Nasionál (PN), kinta ne’e.

Notísia Relevante: DTP Liquiçá Laiha Koñesimentu Prezensa Kompañia Marino Enterprise

Nia hatutan: “Ida ne’e halo pergunta ba kualkér ema ida tantu iha públiku no órgaun sira ne’ebé mak bele análize ba situasaun ne’e.

Arão Noé rona deklarasaun Prezidente Tribunál Rekursu, Deolindo dos Santos, ne’ebé mak dehan kazu sivíl ne’e disputa entre ema na’in-rua no laiha impaktu ba prosesu Estadu nian, maibé PPN lakohi fó komentáriu, inklui intervensaun Xanana Gusmão.

“Agora tanba sá mak ba taka tiha hotu rai ne’ebé kompañia (China Harbour) halo servisu ba, ida ne’e mak problema, tanba ne’e presiza iha klarifikasaun ba prosesu ida ne’e, nune’e labele kria polémika iha públiku no labele impata servisu kompañia ninian’’, nia dehan.

Tuir nia, ba projetu ne’e Timor-Leste presiza garantia ba prosesu konstrusaun ne’e.

“Projetu ne’e boot. Projetu ho montante millaun $400, Timor-Leste investe ho millaun $120 no  kompañia ne’ebé halo Parséria Públiku Privadu (PPP) ne’e ho millaun$280, ne’e katak presiza garantia ida para prosesu konstrusaun ne’e bele la’o ba oin no projetu ne’e mós ba tinan naruk tanba interese Estadu nian’’, nia esplika.

Nia dehan tan, Portu Dili ki’ik-oan liu, entaun tenke iha portu boot ida ho kualidade di’ak, atu nune’e bele atende sirkulasaun ró sira ho fásil.

Tanba ne’e mak kompañia China Harbour ke’e-fatuk iha área Kaitehu, suku Mota Ulun hodi kontrui Portu Tibar ne’e.

Jornalista: Evaristo Soares Martins

Editór: Xisto Freitas

 

HAKEREK NO HATÁN

Please enter your comment!
Please enter your name here