Xanana Gusmão vizita Portu Tibar hodi enkoraja traballadór sira kontinua hala’o servisu. Imajen/Eugénio Pereira

LIQUIÇA, 11 setembru 2019 (TATOLI)- Komandante ein-Xefe FALINTIL,  Kay Rala Xanana Gusmão, ohin, kontinua hala’o vizita ba Sentru Produsaun Fatuk Britas  hodi akompaña servisu Kompañia Internasionál China Harbour  Engineering (CHE) ne’ebé hala’o servisu iha área Kaiteu, Aldeia Mota Ikun, Suku Mota Ulun, Postu Administrativu Bazartete, Munisípiu Liquiça.

Notísia Relevante : Prezidente Tribunal Rekursu Konsidera Reasaun Xanana Motiva Justisa

Área produsaun britas iha Aldeia Mota-ikun, Suku Mota-ulun, Postu Administrativu Bazartete, Munisípiu Liquiçá. Imajen/Eugenio Pereira

Xanana hala’o vizita ne’e hafoin, horiseik nia hirus tun direita ba sobu lutu ne’ebé Kompañia Marino Enterprise taka  hafoin Tribunál Distritál Dili hasai desizaun  afavór ba Kompañia hodi impede produsaun britas ba projetu Portu Tibar.

Pesoa Eminente g7+ ne’e orienta tékniku kompañia CHE nian kontinua hamoris mákina hodi prodús nafatin fatuk britas no rai henek hodi lalin kedas ba Portu Tibar hodi funsiona servisu la’o nafatin.

“Imi haree ba leten ne’ebá agora produsaun fatuk ne’ebé kontínua prodús rai ho fatuk atu uza para funsiona servisu iha Portu Tibar,”  Xanana  lia tun ba jornalista sira.

Xanana dehan, kompañia CHE iha legalidade atu halo produsaun fatuk ne’e, tanba Autoridade Nasional Petróleu no Mineral (ANPM) halo ona peskiza no identifikasaun ba área katak, fatuk sira ne’e maka bele uza hodi halo kontrasaun ba portu iha Tasi  laran.

“Fatuk no rai henek sira ne’e maka ANPM mai haree nia kualidade di’ak liu bele uza ho durasaun tinan naruk liu-liu atu halo hanesan Portu ne’ebé konstrusaun ne’e iha tasi okos,” Xanana esplika.

Xanana hatutan, nia parte mós haruka ona karta ba Diresaun Nasional Terras Propriedade Nasional no Liquiça atu aprezenta dadus Kompañia Habour Engineering  aprezenta uluk lisensa ambientál halo esplozaun ka Kompañia Marino Enterprise rasik seidauk hetan lisensa atu halo esplozaun.

Hafoin vizita fatin esplozaun fatuk, Xanana kontinua vizita ba Portu Tibar hodi haree funsionamentu servisu tomak iha Portu Tibar.

Eis Primeiru-Ministru Xanana dezafia parte hotu-hotu atu tau aas nafatin interese nasionál, tanba Portu Tibar ne’e halo atu fó benefísiu ba prosesu dezenvolvimentu Timor-Leste.

“Portu  hanesan indústria  importante ida ba ita nia estadu no nasaun labele iha fali ema ida atu halo impedimentu,” Xanana afirma tan.

Iha parte seluk, Xanana mós kontaktu kedas Komandu PNTL hodi monta membru Polisia Batallaun Orden Públiku (BOP) halo kedas seguransa ba kompañia hodi garantia servisu la’o nafatin.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here