Núncio Apostólico iha Timor-Leste, Arche-bispo, Mgr. Joseph Marino, lee hela karta Vatikanu nian kona-ba anúnsiu foti Dioseze Dili nu'udar Archidiocese Metropolitanu no nomea Bispu Dioseze Dili, Don Virgílio do Carmo da Silva, nu'udar Arcebispo ba dala uluk. Foto Mídia PR

DILI, 11 setembru 2019 (TATOLI) – Vatikanu ofisiálmente anúnsia Dioseze Díli sai nu’udar Archidiocese no foti Don Virgílio do Carmo da Silva, SDB,  nu’udar Arcebispo (Uskup Agung-termu Indonézia).

Anúnsiu ofisiál ne’e Vatikanu fó sai iha misa agradesimentu Tinan 30 Komemorasaun Vizita São João Paulo II, iha Katedrál Dili, ohin.

Anúnsiu ne’e lee hosi Núncio Apostólico iha Timor Leste, Arche-bispo, Mgr. Joseph Marino.

“Ohin, ofisiálmente Vatikanu foti Dioseze Dili nu’udar Archidiocese Metropolitanu no nomea Bispu Dioseze Dili, Don Virgílio do Carmo da Silva nu’udar Arcebispo ba dala uluk,” Joseph Marino lee karta ofisiál hosi Santa Sé.

Iha liafuan agradesimentu, Bispu Dioseze Dili ne’ebé eleitu nu’udar Arcebispo hateten, novidade ne’e nu’udar surpreza ida liliu nomeasaun ne’ebé nia hetan.

Maski nune’e, Don Virgílio haklaken la’ós nia mak soi ba kna’ar ida ne’e maibé povu Timor-Leste mak soi ba kna’ar refere.

Tanba ne’e, maski todan oinsá, nia prontu atu hala’o kna’ar relevante.

Ikus liu, D. Virgílio husu sarani sira atu haforsa nia iha kna’ar ne’e liuhusi orasaun.  “Ha’u husu sarani sira atu reza ba ha’u iha kna’ar ne’e,” Bispu Virgílio husu.

Arcebispo nia papél atu tau-matan ba Igreja Katólika sira iha territóriu tomak liuhusi koordenasaun ho bispu sira seluk ne’ebé dirije dioseze.

Jornalista: Cipriano Colo

Editór: Xisto Freitas

2 KOMENTÁRIU

HAKEREK NO HATÁN

Please enter your comment!
Please enter your name here