Prezidente Institutu Petróleu no Jeolojia (IPJ), Helio Casimiro Guterres. Imajen António Goncalves

DILI, 11 setembru 2019 (TATOLI) – Prezidente Institutu Petróleu no Jeolojia (IPG, sigla portugés), Hélio Casmiro Guterres, hatete orsamentu ba IPG iha tinan oin millaun $2, nune’e IPG husu adisionál pur volta millaun $10 atu harii laboratóriu.

“Daudaun ne’e ami laiha edifísiu própriu, tanba ne’e husi osan millaun 2 ami haree hodi tinan oin bele harii edifísiu própriu ida”, Hélio dehan ba Tatoli iha Ministériu Finansa Aitarak-Laran, ohin.

Prezidente IPG ne’e esplika sobre adisionál millaun $10 ho razaun presiza iha laboratóriu tanba foin daudaun Governu fó ona kompeténsia ba IPG atu halo kontratu ho kompañia Austrália hodi lori Timor-Leste nian rikusoin iha tasi-laran mai no agora matéria sira ne’e sei armazena hela iha Austrália no hein oinsá atu lori mai.

“Tanba ne’e ita husu ba Komité Revizaun Orsamentu Polítika atu aumenta tan osan harii laboratóriu hodi rai sasán sira ne’e”, tenik Hélio.

Kona-ba fatin atu harii edifísiu, Prezidente ne’e hatete IPG rasik servisu hamutuk ho Ministériu Justisa (MJ) liberta ona rai iha MSSI nia kotuk no daudaun MJ fó ona lampu verde no hein halo aproximasaun no bele halo ona re kompensasaun ba komunidade iha fatin refere nune’e tinan oin hahú ona konstrusaun.

Orsamentu IPG nian iha tinan kotuk pur volta millaun 1.8 ne’ebé prevee ba  kustu operasionál hodi halo estudu identifikasaun ba iha rikusoin Timor-Leste nian ne’ebé halo husi Oekusi no agora to’o ona iha Likisá.

Iha aprezentasaun IPG aprezentasaun proposta orsamentu 2020 ba komité revizaun katak Timor-Leste potensialidade ba rekursu minerál osan-mean, osan-mutin, mármore.

“Maibé ita espera orsamentu adisionál bele millaun 10”, dehan Prezidente IPG ne’e.

Nia hatutan orsamentu ba tinan oin, IPG kontinua foka ba estudu identifikasaun rekursu minerál iha territóriu Timor-Leste.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here