Ministru Obra Públika, Salvador Soares dos Reis Pires, Imajen/Florencio.

DILI, 10 setembru 2019 (TATOLI) – Ministru Obra Públika (MOP), Salvador Eugénio Soares dos Reis Pires, hatete iha 19 setembru-outubru tinan ne’e, Governu Timor-Leste kandidata atu sai membru Transparénsia Infrastrutura, ho naran Construction Sector Transparency (CoST) Internasionál.

“Ita sei hatama kandidatura atu membru CoST sira avalia no haree ita-nia kapasidade no polítika iha sistema transparénsia kontabilidade no kombate korrupsaun iha setór infrastrutura”, Ministru Salvador ba Ajénsia Tatoli iha edifísiu Ministériu Finansa, Aitarak-Laran, ohin.

Objetivu husi kandidatura ne’e, Ministru Salvador dehan atu kria multi stakeholders (parte interesada) liuliu kria sistema CoST ne’e iha prinsípiu importante haat hanesan garantia transparénsia no kontabilidade iha setór infraestrutura hanesan grupu serbisu multi-parseria, kontabilidade sosiál, loke dadus ka data disclosure no assurance.

“MOP hakarak atu halo dadus kontratu públiku iha setór infraestrutura nakloke ba públiku hahú husi preparasaun, konkursu, selesaun no implementasaun to’o entrega projetu sira hodi populasaun hotu-hotu bele akompaña prosesu ezekusaun orsamentu ba obra ida nian”, katak.

Ministru Salvadór adianta membru CoST sira fó kritéria ba Timor-Leste katak atu sai membru tenke iha sistema aprovizionamentu ba konkursu públiku no tenke fó sai plafon konkursu ba públiku.

“Iha tinan ne’e, MOP rasik hasai plafon ba konkursu ida ne’e hanesan meiu ida atu halo poupansa ba osan, transparente no prevene korrupsaun”, tenik.

Bainhira Governu Timor-Leste sai membru ba CoST, MOP afirma sei estabelese sistema portal dashboard ida hodi akumula informasaun hotu-hotu ba konkursu no sistema aprovizionamentu ne’ebé kualkér ema ida mak online nia bele asesu projetu ho montante hira no kompañia se mak halo.

“Atu povu mós tau-matan ba ezekusaun orsamentu ba projetu ida, liuliu atu eleva nia kualidade, prevene korrupsaun”, tenik.

Tanba ne’e, MOP Salvador enkontru ona ho ekipa CoST, Jestór Rejionál CoST, Clara Feng no Asesór Seniór ba Polítika PFM, Soren K. Jensen, iha loron 2 to’o 6 setembru hodi apoiu esforsu Governu Timor-Leste liuhosi MOP atu integra ba fasilidade transparénsia internasionál refere.

Tuir dadus, nasaun 14 mak adota sistema CoST hirak nee, inklui Honduras, Ukránia, Tailándia, Indonézia no seluk tan.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here