Kapitaun Fragata João da Silva kaer liman ho Kapitaun Fragata Adão Brito ‘Jeky’ hafoin partisipa serimónia konferensista podér iha Komponente Navál F-FDTL, Hera, Dili. Imajen/Mídia F-FDTL

DILI, 10 setembru 2019 (TATOLI)- Komandu FALINTIL-Forsa Defeza Timor-Leste liu husi serimónia transferénsia podér fó fiar ba Kapitaun Fragata João da Silva hodi lidera Komandu Komponente Navál F-FDTL hodi troka Kapitaun Fragata Adão Brito ‘Jeky’.

Vise Xefe Estadu Maiór Jenerál FALINTIL-FDTL, Brigadeiru Jenerál Falur Rate Laek entrega bandeira Komandu Komponente Navál F-FDTL ba Kapitaun Fragata João da Silva. Imajen/Mídia F-FDTL

Serimónia transferénsia podér ne’e hala’o, ohin, liu husi parede Militár partisipa direita husi Vise Xefe Estadu Maiór Jenerál F-FDTL, Brigadeiru Jenerál, Falur Rate Laek, Komandante Komponente Terrestre, Renilde Corte Real, Komandante Komponente iha Komponente Navál Hera Dili.

Komandante Foun Kapitaun Fragata João da Silva sei hala’o nia knaar ho durasaun ba tinan rua hahú husi data simu pose ba oin tuir dekretu lei Prezidente Repúblika.

Vise Xefe Estadu Maiór Jenerál FALINTIL-FDTL, Brigadeiru Jenerál Falur Rate Laek informa, komandu F-FDTL iha ona hanoin atu asegura fronteira Marítima no husu atu komandante foun kontinua hala’o nia misaun servisu ho di’ak liután.

Nia dehan, ba oin Komandu F-FDTL sei koopera ho nasaun viziñu Austrália, Nova Zelándia, Portugál no nasaun seluk hodi ajuda Komponente Navál atu hala’o servisu kontrola seguransa iha fronteira tasi Timor-Leste.

“Ita mesak maibé ita konta ho ita nia kooperasaun bilaterál ho ita nia viziñu sira liu husi ita nia diplomasia militár ne’ebé iha atu fó apoia intermus  seguransa kooperativa iha fronteira marítima,” hateten Falur Rate Laek iha diskursu.

Nia dehan, Komandu F-FDTL sei partilla informasaun ne’ebé fasilita forsa nia planeamentu ba vijilánsia no kontrola Timor-Leste nia fronteira marítima la’ós fasil.

“Ha’u apela ba komandante foun, durante nia komanda iha komponente ida ne’e atu uza didi’ak ninia kompeténsia ne’ebé atribui, no lideransa ne’ebé iha hodi fó atensaun espesiál no konsiderasaun bázika sira, hanesan manutensaun dixiplina iha sirkunstansiál hotu-hotu atu nune’e bele garante FFDTL nia profisionalizmu iha públiku  nia matan,” Falur afirma.

Falur dehan, ohin loron iha ierarkia militár nian, kestaun dixiplina maka fatór ida ne’ebé importante tebes, atu atrai povu Timoroan tomak, hodi kontribui ba pás no garante estabilidade nasionál.

Nia hatutan, alende dixiplina hanesan komandante komponente tenke iha asaun komandu iha momentu  hotu-hotu, atu bele garante ofisial, sarjentu no prasa sira nia informadu no orienta do nafatin hodi kumpre tarefa ne’ebé atribui ba sira loron ba loron no evita fallansu no problema ne’ebé mosu, liu-liu iha fim de semana no lisensa férias sira.

Iha fatin hanesan, Komediante Komponente Navál Kapitaun Fragata, João da Silva promete sei hala’o knaar ho dixiplina liu-liu kontrolu servisu membru sira nian atu la’o iha dixiplinár hodi lori Komponente Navál servisu ho profisionál liután.

João dehan, nu’udar komandante foun nian presiza mós efetivu sira iha komponente navál no komandu F-FDTL sira hotu nia apoiu hodi bele implementa  planu sira ne’ebé iha ona.

“Ita nian meius sira ne’e la sufisiente, maibé ha’u fiar katak governu iha kometimentu atu arranja tan meius sira ne’e para ita nian prezensa iha tasi ne’e 24 oras hodi asegura ita nian tasi ho di’ak liu tan,”  nia hatete.

Oras ne’e daudaun Komponente Navál nia ekipamentu  servisu hanesan ró militár nian balun sei halo hela manutensaun.

Governu Austrália liu husi Ministériu Defeza Austrália deklara fó ona apoiu ró militár rua ne’ebé sei konstrui hela iha Austrália atu entrega ba Governu Timor-Leste iha tinan 2023.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here