Komandante Polisia na’in hitu hasai fotografiia hamutuk, hafoin simu pose iha Komandu PNTL Caicoli Dili, segunda (09/09/2019).Imajen/Eugénio Pereira

DILI, 09 setembru 2019 (TATOLI)-Komandu Polisia Nasionál Timor-Leste  (PNTL) ezekuta ona sira nia Orsamentu Jerál Estadu (OJE) husi to’o setembru  ne’e atinje ona porsentu 59.3.

OJE 2019 ba PNTL ho orijen $34,341,878.00, kompromisu sira $2,978,032.29, obrigasaun sira, $1,863,463.39, Atuál, $18,502,586.01, Saldu $10,997,796.31.

Komandante Jerál Polisia Nasionál Timor-Leste (PNTL), Komisáriu Polísia Faustino da Costa dehan, sira sei halo esforsu másimu too fulan Dezembru 2019 ezekusaun sei la’o too porsentu 100.

OJE 2020 Tokon $30 La Sufisiente

Iha parte seluk, Komisáriu Faustino dehan, Komandu PNTL no Ministériu Interior mós halo ona enkontru koordenasaun hodi diskute planu no programa ba tetu OJE 2020 nian.

Ba OJE 2020 nian, Governu liu husi Ministériu Interiór fó de’it tokon $30 no Komandu PNTL haree katak, orsamentu ne’e la sufisiente atu haree ba nesesidade PNTL nian tomak, tanba iha OJE 2019 PNTL hetan ona tokon $34,341,878.00

“Ami halo ona preparasaun no sei halo enkontru ho Ministru Interiór para aprezenta OJE 2020 nian ba governu atu haree proposta orsamentu ne’e para Komisaun Revizaun Orsamentu Ministériu Finansas sei haree, tanba OJE 2019 atuál ho $34,341,878.00 agora tetu orsamentu 2020 ho tokon $30 de’it la sufisiente atu responde ba nesesidade polisia nian, entaun ami prepara mós proposta adisionál para haree,” informa Komisáriu  Faustino ba jornalista, ohin, iha Kuartél Jerál PNTL, Caicoli, Dili.

Tuir programa no planu PNTL nian sei propoin OJE 2020 ho montante tokon $34 ba leten, maibé seidauk serteza tanba ne’e komandu PNTL prepara mós proposta adisionál ba parte governu sei haree.

Jornalista : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here