Ofisiál FFDTL lori saudozu Lucas da Costa Rama Metan ba Parlamentu Nasionál hodi hetan omenájen ikus hosi membru PN sira antes lori saudozu ba haloot iha Jardim dos Herois Metinaro, segunda ne'e. Imajen TATOLI/Egas Cristóvão

DILI, 9 setembru 2019 (TATOLI) – Parlamentu Nasionál (PN) iha segunda lorokraik ne’e, hato’o omenájen ikus ba fundadór RENETIL, saudozu Lucas da Costa “Rama Metan” iha Parlamentu Nasionál.

“Lori Parlamentu Nasionál nia naran hato’o sentida kondolénsia ba família matebian saudozu Rama Metan,” dehan Prezidente Parlamentu Nasionál, Arão Noé de Jesus da Costa Amaral.

Objetivu hosi omenájen ida ne’e tanba saudozu mós fó kontribuisaun direta no indireta ba luta libertasaun nasionál durante periodu invazaun Indonézia. Aleinde ne’e, saudozu mós antes ne’e hala’o kna’ar hanesan deputadu iha Segunda Lejizlatura.

Hafoin Prezidente PN lori Órgaun Lejizlatura nia naran hato’o sentida kondolénsia, bankada hotu iha Parlamentu Nasionál mós hato’o sentida kondolénsia ho matan-ween tanba konsidera Timor-Leste lakon luta na’in no matenek di’ak ida.

“Ho laran susar ita hotu mai hato’o omenájen ikus ba ita-nia maluk timoroan ida ne’e. Ha’u lori bankada FRETILIN nia naran hato’o omenájen ikus ba saudozu. Ita labele tanis no laran susasr de’it. Ita mós labele haluha luta ne’ebé saudozu kontribui ona ba nasaun ne’e,” deklara deputada bankada FRETILIN, Josefa Pereira.

Nune’e mós, deputadu bankada CNRT, Patrocínio Fernandes, hateten saudozu Rama Metan nia kontribuisaun ba nasaun ne’e boot tebes liliu organiza estudante sira iha Indonézia hodi lori anin fresku ba movimentu ukun rasik-aan.

“Rona novidade katak saudozu Rama Metan laiha ona mundu ne’e. Lakon nia vida iha nia kompaineiru sira-nia leet. Husik mós buat hotu. Tanba ne’e, bankada CNRT hato’o ami-nia sentida kondolénsia profunda ba família, oan ki’ak, faluk no kolega tanba lakon ona aman no kompaineiru luta di’ak ida. Ami husu ba Jesus Kristu atu haraik fatin naroman ba ita atan ne’e iha aman Maromak nia reinu lalehan,” deputadu ne’e haklaken.

Entretantu, deputadu bankada Partidu Demokrátiku (PD), António da Conceição ko’alia ho matann-ween hodi fó adeus ba nia kompaineiru Rama Metan. “O nia luta hamutuk ho ami, ami sei la haluha. O nia memória sei hamutuk ho ami hodi hatutan ba nafatin,” nia tatoli.

Antes lori saudozu ba Parlamentu Nasionál, sei lori uluk saudozu ba sede PD, RENETIL no Komité Sentrál FRETILIN (CCF-sigla portugés) hodi hetan presta omenájen ikus. Hafoin ramata omenájen iha PN, lori direta saudozu ba fatin deskansa ikus nian iha Jardim dos Herois Metinaro.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here