Ministru Reforma Lejizlativa no Asuntu Parlamentár, Fidelis Manuel Leite Magalhães (karuk), Ministra Finansa ein-Ezersísiu, Sara Lobo Brites (klaran), Primeiru-Ministru, Taur Matan Ruak (loos) partisipa iha revizaun ba pakote OJE 2020, iha salaun Ministériu Finansas, Aitarak-Laran, Dili, segunda (09/09/2019). Imajen/Tatoli.

DILI, 09 setembru 2019 (TATOLI) – Governu liuhosi Ministériu Finansa (MF) realiza ona reuniaun Komité Revizaun Orsamentu Polítika (KROP) ne’ebé sei hala’o durante semana rua.

Tuir karta sirkulár hosi MF katak relasiona ho aprovasaun kalendáriu preparasaun Orsamentu Estadu (OJE) 2020 ne’ebé sirkula ona liuhosi sirkulár orsamentu 2020 nú.04/VIII/GVM-DGFE/2019-08, data 09 agostu katak reuniaun Komité Revizaun Orsamentu Polítika realiza iha loron 9 remata iha 21 setembru 2019.

“Konsidera reuniaun ne’e importante tebes, nune’e husu ba membru Governu, responsavel hosi Instituisaun Estadu, responsavel hosi ajénsia públika autónoma, Autoridade Administradór Munisipiu atu fó importánsia hodi atende no halo diskusaun ho membru KROP nune’e hodi hetan konsiderasaun final ba Orsamentu Jerál Estadu 2020 nian”, haktuir karta sirkulár hosi MF ne’ebé TATOLI asesu, ohin.

Iha loron dahuluk ba realizasaun KROP nian aprezenta hosi Setór Kapitál Sosiál kompostu hosi, Prokuradór Jerál Repúblika, Ministériu Edukasaun, Juventude no Desportu (SEJD), Ministériu Ensinu Superiór, Siénsia no Kultura. National Institute for Science and Technology (INCT), Institutu Politékniku Betanu (IPB), Arkivu Muzeu Rezisténsia Timorense (AMRT) no Universidade Nasionál Timor-Leste (UNTL).

Tuir Kalendáriu, aban (10/09), sei aprezenta proposta orsamentu hosi Ministériu Saúde no komponente sira no loron tuirmai hosi Ministériu Asuntu Kombatente Libertasaun Nasionál ho komponente sira.

Iha kinta, aprezenta hosi Ministériu Koordenadór Asuntu Ekonómiku (MKAE) no sesta, diskusaun proposta orsamentu ne’ebé aprezenta hosi Ajénsia Promosaun no Esportasaun Timor-Leste Trade Invest, Servisu Rejistu Verifikasaun Emprezariál, Sentru Lojístika Nasionál no Setór Institusionál Framework no Boa Governasaun ne’ebé kompostu hosi Ministériu Defeza, F-FDTL, Institutu Defeza Nasionál, Servisu Nasionál Intelijénsia (SNI), Ministériu Interior, PNTL.

Reuniaun ba semana oin, loron dahuluk, aprezenta hosi Ministériu Justisa, Tribunál, Komisaun Funsaun Publika, Polísia Sientífika Investigasaun Kriminál, Institutu Nasionál Administrasaun Publika (INAP), Konsellu Imprensa, Komisaun Anti Korrupsaun, Komisaun Nasionál ba Eleisaun (CNE, sigla portugés), no Inspesaun Jerál Estadu (IJE).

Iha tersa (17/09), hosi Ministériu Administrasaun Estatál kompostu hosi munisípiu 12 eseptu Rejiaun Administrativa Espesiál Oekusi-Ambenu (RAEOA). Nune’e mós Ministériu Reforma Lejizlativa no Asuntu Parlamentár, no Sekretária Estadu Komunikasaun Sosiál.

Iha kuarta, aprezenta hosi Prezidente Repúblika, Parlamentu Nasionál, Gabinete Primeiru-Ministru, kompostu hosi Ajénsia Tecnologia da Informação e Comunicação (TIC) no Chega, Ministériu Prezidénsia Konsellu Ministru, Konsellu Delimitasaun no Definitiva ba Fronteira Marítima, no Ministériu Negósiu Estranjeiru mo Kooperasaun.

Nune’e, iha loron tuirmai hosi Setór Infraestrutura kompostu hosi Ministériu Planeamentu no Investimentu Estranjeiru, Ministériu Obra Publika, Institutu Jestaun no Ekipamentu, Ministériu Transporte no Komunikasaun, Autoridade Aviasaun Sivíl Timor-Leste, Autoridade Portuária Timor-Leste, Autoridade Reguladora Komunikasaun, no Provedoria Direitu Umanu no Justisa (PDHJ, sigla portugés).

Iha sesta, hosi Fundu Kapitál Dezenvolvimentu Umanu (FDCH, sigla portugés), RAEAO no ZEESM, Ministériu Finansa, Dotasaun para Todo o Governu no sábadu ( 21/09) nu’udar loron ikus ne’ebé aprezenta husi Fundu Infraestrutura, no ezersísiu final Komité Revizaun Orsamentu Polítika.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here