Foto hamutuk komandante polisia na’in hitu (7) simu pose iha Komandu PNTL, Caicoli Dili, segunda (09/09/2019).Imajen/Eugénio Pereira

DILI, 09 setembru 2019 (TATOLI)-Komandante Jerál Polisia Nasionál Timor-Leste (PNTL), Komisáriu Polísia Faustino da Costa, akompaña husi Segundu Komandante Jerál Komisáriu Polísia Mateus Fernandes, ohin, iha Kuartél Jerál PNTL, fó pose ba komandante polisia na’in ualu (8).

Notísia Relevante : Komisáriu Faustino Fó Pose Ba Komandante Na’in Lima

Komandante sira ne’e simu pose liu husi juramentu maka hanesan, Superintendente Asistente Joni Viana das Regras ho númeru 10017 transferénsia husi Baucau ba Segundu Komandante Munisipiu Manatuto, Superintendente Asistente, José Casimiro de Carvalho ho númeru 10116 transferénsia husi Manatuto ba Segundu Komandante Jerál Baucau, Superintendente Asistente, Raimundo de Araújo ho númeru 10347 transferénsia husi Ermera ba Komandu Jerál nu’udar Diretór Ligasaun Kursu Ofisial PNTL ba Institutu Defeza Nasionál (IDN), Inspetór Xefe, Felner Benyamin C.B. Corte Real ho númeru 10931 transferénsia husi Unidade Espesiál Polisia (UEP) ba Xefe Departamentu Lojístika Interinu, Komandu Administrasaun PNTL, Inspetór Xefe António da Costa Freitas ho númeru 10931 transferénsia husi Komandu Jerál ba Segundu Komandante interinu Polisia Ermera.

Inspetór Xefe Inocêncio da Costa Freitas ho númeru 10868 transferensia husi Komandu Jerál Administrasaun ba Xefe Departamentu Tránzitu Seguransa Rodoviáriu interinu, Inspetór Xefe Helena das Dores Alves ho númeru 10039 transferénsia husi Komandu Operasaun ba Xefe Departamentu Polisia interina, Inspetór Xefe Grasiano Moniz Amaral ho númeru 10416 Komandante Munisipiu Liquiça.

Komandante Jerál PNT, Faustino husu ba Komandante foun ne’e atu presta servisu ho di’ak liután hodi fó susesu ba sira nia servisu tuir konfiansa ne’ebé komandu atribui hodi garante lia no orden ba nasaun no povu hodi moris ho ambiente dame no fó susesu ba progresu dezenvolvimentu.

Nia dehan, nomeasaun ne’e hala’o liga mós ba orientasaun polítika VIII Governu liu husi Ministériu Interior hodi tau matan reforma instituisaun Komandu PNTL tuir lei hodi fó prioridade ba Polisiamentu Komunitáriu no Tránzitu Rodoviáriu.

“Ita ezije nafatin ba komandante sira ho mudansa ba knaar bele halo mós mudansa ruma ba servisu iha terrenu liu-liu liga ba atividade prioridade instituisaun nian no governu nia programa atu garante pás ba nasaun ne’e,” afirma Komanda Fuastino.

Fuastino dehan, nomeasaun ne’e sei kontinua hala’o iha etapa tuir mai hodi la’o tuir planu programa Komandu PNTL nian atu muda komandante polisia ida labele hala’o knaar kleur liu iha kada munisipiu.

Iha fatin hanesan Segundu Komandante Munisípiu Manatuto, Superintendente Asistente, Joni Viana das Regras,  kontente ho mudansa servisu husi Baucau ba Manatuto atu kontinua implementa servisu ho di’ak liután.

“Ha’u kontente no priviléjiu tebes tanba Estadu liu husi Komandu PNTL sei kontinua tau konfiansa aas mai ata oan ha’u ho kolega sira no muda ha’u husi Baucau mai Segundu Komandante iha Manatuto oinsá maka asume kargu iha ha’u nia moris fatin para kontinua servisu,” tenik Joni Viana.

Joni Viana apresia, durante tinan hitu (7) hala’o knaar segundu komandante iha Baucau kria relasaun di’ak tebes ho komunidade, joven inklui autoridade lokál, igreja, veteranu no sosiedade sivíl sira hodi buka rezolve problema sira ne’ebé mosu hodi hetan dame.

“Hanesan polisia ida sei halo esforsu kria nafatin kooperasaun ho povu, para povu sente katak, sira hetan seguru husi polisia iha fatin hotu- hotu no polisia tenke kria komunikasaun di’ak ho sira atu hamutuk kontribui buat di’ak hotu-hotu ba ita nia nasaun no sosiedade,” Joni Viana hateten.

Nia hatutan, ho ambiente foun nu’udar pasu importante ida atu kria fila kooperasaun ho komunidade no autoridade sira para bele hala’o servisu ho susesu liun tán.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here