DILI, 9 setembru 2019 (TATOLI) – Ekipa Arbitrajen, Órgaun Liga Futeból Amadora (LFA) no Federasaun Futeból Timor-Leste (FFTL), desidi ona atu konvida ábitru internasionál hosi Asian Football Confederation (AFC) atu dirije fali jogu Primeira Divizaun hahú hosi jornada 12 ba leten.

Desizaun ida ne’e LFA foti bazeia ba reuniaun ne’ebé hala’o iha semana kotuk hamutuk ho diresaun tomak hodi halo avaliasaun ba jogu LFA nian liliu jogu primeira volta to’o agora ne’ebé fila-fila ona hamosu tensaun maka’as hosi adeptu sira satán hela jogu tolu tuir mai.

Tuir oráriu, árbitru hosi AFC na’in rua mak sei to’o Timor-Leste iha 12 setembru agora no sei fila hikas iha 30 setembru.

“Ami parte hotu hamutuk ho observadór hosi FFTL bazeia ba pontu rua. Ida haree ba tabele klasifikasaun laiha klube ida mak kandidatu forte atu kampiaun entaun Ekipa Arbitrajen deklara tensaun jogu sei sa’e maka’as tanba ekipa tolu mak iha oportunidade atu sai kampiaun. Nune’e, ekipa konjunta hola desizaun hodi husu apoiu ba arbitrajen hosi AFC nian mak atu dirije,” dehan Sekretáriu Jerál LFA, Alexandre Vong “Lexy” liuhosi konferensia imprensa ne’ebé hala’o iha salaun Xanana Sport Center, Bairro Formosa, segunda ne’e.

Nia esplika, Ekipa Arbitrajen hosi AFC la’ós mai apoiu huu de’it, maibé atu fahe mós eperiénsia ba árbitru timoroan sira nune’e bele fó efeitu ba jogu ne’ebé sei mai.

“AFC apoiu pedidu LFA nian ne’ebé submete ba FFTL, aprova fó árbitru na’in rua atu mai akompaña jornada tolu ikus ne’e, nune’e bele mantein intensidade no kualidade jogu tolu mai ne’e hodi hatán mós ba preukupasaun públiku ninian,” dehan Lexy.

Árbitru internasionál rua ne’ebé sei mai ne’e bazeia mós ba dezenvolvimentu futeból nian, tanba AFC tenke apoiu ofisiálmente ba nia membru sira hodi dezenvolve futeból.

“Ko’alia kona-ba kontratasaun ba árbitru sira ne’ebé sei mai, hanesan ema profisionál entaun ita tenke kontrata sira maibé la’ós kompeténsia LFA. Ne’e kompeténsia FFTL,” nia esplika.

Lexy subliña, uluk LFA hahú husu ona apoiu árbitru ba AFC maibé pedidu ne’ebé submete la hetan aprovasaun tanba seidauk la’o tuir prosedimentu loloos

Iha fatin hanesan, Diretór Téknikú FFTL, Gaspar Quintão, hateten jogu LFA hosi primeira volta la’o di’ak tebes maibé tensaun jogu mak sa’e maka’as.

“Ita haree jogu la’o di’ak tebes. Tensaun mós sa’e maka’as. Ezijénsia mós maka’as. Entaun, ba oin sei maka’as liután. Nune’e mak ita presiza duni apoiu hosi árbitru internasionál,” tenik Quintão.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here