Ministra Solidariedade Sosiál no Inkluzaun Armanda Berta dos Santos. Imajen/António Gonçalves

DILI, 05 setembru 2019 (TATOLI)-Ministra Solidariedade Sosiál no Inkluzaun (MSSI), Armanda Berta dos Santos, rejeita  informasaun ne’ebé ‘lekar’ iha rede sosiál Facebook katak, Governu liu husi MSSI distribui foos fuhuk ka aat ba Sarani no povu Iliomar, Munisípiu Lautem, foin lalais ne’e.

Liu husi eventu Joven ba Kristu ne’ebé konsentra iha Parókia Iliomar, Lautem, komisaun organizadora sira hateten, foos ne’ebé hetan apoiu husi MSS hamutuk saka neen nulu (60) fuhuk ona no fó han ba animal de’it mós animal sei la han.

“Akuzasaun husi komunidade Iliomar-Lautem  katak MSSI fahe foos aat ne’e la loos tanba Ministériu  sidauk fahe foos aat ba komunidade sira hotu inklui mós povu Lospalos,” afirma MSSI, Armanda Berta dos Santos, ohin, hodi responde Ajénsia TATOLI iha Edifísiu MSSI,  Caicoli, Dili.

Relasiona ho akuzasaun ne’e, Ministra dehan, daudaun ne’e, ekipa MSSI hala’o hela levantamentu hodi hetan informasaun loloos no momoos kona-ba ida ne’e.

“Ha’u hakfodak lee  notísia  ida ne’e, tanba durante ne’e Ministériu sempre fornese foos di’ak ba ita ninia povu iha munisípiu sira, labele politiza sasán,” hateten Ministra Armanda Berta dos Santos.

Ministra Berta hateten, sujestaun ho kritika hotu ba servisu no atendimentu MSSI nian importante tebes atu MSSI bele hadi’a nia jestaun di’ak hodi atende povu di’ak liu tan iha futuru.

Jornalista : Nelson de Sousa

Editór       : Francisco Simões

 

 

HAKEREK NO HATÁN

Please enter your comment!
Please enter your name here