Ministru Reforma Lejizlativa no Asuntu Parlamentár no Ministru Turizmu Komérsiu no Indústria interinu, Fidelis Manuel Leite Magalhães. Imajen/TATOLI.

DILI, 05 setembru 2019 (TATOLI)-Ministru Reforma Lejizlativa no Asuntu Parlamentár no Ministru Koordenadór Asuntu Ekonómiku (MKAE), Fidelis Manuel Leite Magalhães, hatete Governu planeia ona atu konstrui sentru ba parke industriál iha Munisípiu Likisá iha tinan 2020.

“Ami planu atu harii parke indústria iha Munisípiu Likisá atu hahú konstrusaun tinan oin ho rai ektare 64”, MKAE interinu ne’e informa bainhira enkontru ho Sentru Formasaun Senai Bekora no Tibar, Institutu Nasionál Dezenvolvimentu Mão de Obra (INDMO) no Institutu Apoiu Dezenvolvimentu Emprezariál (IADE) iha edifísiu TradeInvest, Kolmera, ohin.

Ministru Turizmu, Komérsiu no Indústria ein-funsaun ne’e dehan sentru ba parke industriál ne’e atu fasilita investidór internasionál no nasionál atubele loke fábrika iha Timor-Leste hodi fó servisu ba timoroan sira.

Parke ne’e sei konstrui hanesan fatin sentrál ida ne’ebé mak iha sítiu refere investidór sira sei asesu ba rai, bee inklui eletrisidade.

Orsamentu ba konstrusaun ne’e sei propór iha Orsamentu Jerál Estadu (OJE), atu avansa kedan ho konstrusaun iha tinan oin hodi finaliza iha 2022.

Planu ne’e, sei iha diskusaun nia laran tanba semana oin mak foin aprezenta iha komisaun revizaun orsamentu, nune’e orsamentu sira ne’e sei sofre alterasaun katak bele aumenta no bele menus.

“Maibé parke indústria ne’e kuaze ho orsamentu millaun $15 ne’e sei la’o hela iha diskusaun nia laran, ne’ebé bele aumenta no bele hamenus”, katak.

Jornalista : Florencio Miranda Ximenes

Editora : Maria Auxiliadora

1 KOMENTÁRIU

  1. Se bele karik nai-ulun sira realiza uluk promesas sira nebe promete ona iha tempu kampanha ne lai mak hare planu tan buat foun tamba planu barak-barak orsida halo komfuzaun no la hatene atu implementa uluk nebe tamba tempu tinan lima n la nataon atu realiza hotu buat sira ne nebe krik bele realiza uluk lai promesas sira uluk nian ne lai🙏🙏🙏
    Bom trabalhu.

HAKEREK NO HATÁN

Please enter your comment!
Please enter your name here