Chief Executive Officer (CEO) Telkomcel Yogi Rizkian Bahar. Imajen/TATOLI

DILI, 03 setembru 2019 (TATOLI) – Operadora telekomunikasaun Telkomcel Timor-Leste prontu apoiu Biblioteka dijitál on-line gratuita ba Universidade Nasionál Timor Lorosa’e (UNTL) tanba hakarak ajuda dezenvolvimentu  rekursu umanu  Timor-Leste nian.

Daudaun ne’e Telkomcel hamrik tinan neen ona maibé UNTL nu’udar instituisaun ensinu superiór mak dahuluk halo kooperasaun ho Telecomcel hodi tau-matan ba futuru estudante sira nian.

Xefe Ezekutivu Telkomcel, Yogi Rizki Bahar, hateten ida nu’udar istória foun ida ba Timor-Leste no mós ba Universidade sira iha Indonézia tanba to’o agora instituisaun Ensinu Superiór iha Indonézia seidauk halo hanesan ne’e.

Ne’e duni kuandu UNTL liuhusi ninia planu ida ne’e hodi husu apoiu Telkomcel nian, Telkomcel laiha rezerva tanba Telkomcel haree katak ho programa ka planu hanesan ne’e mak sei garante kualidade no kapasidade estudante sira nian ba futuru.

“Ami hakarak haree UNTL bele prodús ninia estudante sira iha futuru ho kualidade atu nune’e bele sai lideransa foun ba nasaun Timor-Leste,” hateten Ezekutivu, Yogi Rizki  ba jornalista sira hafoin ramata lansamentu atualizasaun Biblioteka Dijitál On-line iha Kampus Sentrál UNTL, tersa (03/09/2019).

Nia dehan, ne’e mak pasu importante Telkomcel nian liuhusi fasilidade Dijitál ne’e bele ona hakmaan todan estudante sira nian atu la sosa tan livru ho folin ne’ebé karun.

Estudante sira bele asesu livru sira ne’e iha link ne’ebé prepara ona ho gratuita.

Dalaruma ema balun dehan Telkomcel halo hanesan ne’e iha lukru ka lae? Tinan neen ona Telecomcel foin hetan kooperasaun.

“Ne’e la importante ba Telkomcel atu hetan lukru maibé oinsa jerasaun foun Timor-Leste nian bele kompete,” konsidera Ezekutivu Telkomcel, Yogi Rizki Bahar

Jornalista : Tomé Amado

Editór.       :Rafy Belo

HAKEREK NO HATÁN

Please enter your comment!
Please enter your name here