Jardín 12 Novembru, Motél, iha prosesu konstrusaun. Imajen/Osória Marques

DILI, 03 agostu 2019 (TATOLI)-Ministériu Turizmu, Komérsiu no Indústria (MTKI) deside hodi tau naran jardín iha Motaél “12 de Novembro” tanba baze ba istória no estátua 12 Novembru ne’ebé Governu harii iha sítiu refere.

Diretór Jerál Turizmu, José Filipe Dias Quintas, informa haree ba istória katak molok atu akontese 12 Novembru, misa ne’e hahú iha igreja Motaél.

“Ita haree estátua ne’e karik kolega sira husi Komité 12 Novembru maka apoia Governu mak konstrui iha ne’ebá, maibé ami tau naran tanba haree ba estátua ne’ebá no atu atrai vizitante no turista sira bá vizita, presiza hakerek nia naran”, Diretór Jerál ne’e afirma iha edifísiu TradeInvest, Kolmera, ohin.

Quintas salienta MTKI tau naran jardín ne’e ba 12 Novembru la sala tanba realidade estátua 12 Novembru nian iha ne’ebá no dezeña jardín ne’e MTKI mak halo.

Maski nia rekoñese parte balun la kontente ho naran jardín ne’e, maibé ne’e prosesu demokrasia ne’ebé balun simu no balun la simu. “Ita presiza tuur hamutuk no halo kooperasaun tanba iha setór turizmu ne’e la’ós Governu de’it, maibé ne’e parte hotu-hotu”, afirma.

Entretantu, nia dehan se MTKI la tau naran ba ne’e mós públiku hatene no haree estátua iha ne’ebá nafatin. “Agora, sé mak deside tau estátua iha ne’ebá ne’e la’ós kompeténsia ami-nia”.

Iha parte seluk Komité 12 Novembru (K12N) prefere tau naran saudozu Sebastião Gomes, Diretór José Quintas, dehan tempu besik  MTKI halo koordenasaun no enkontru ho komité 12 Novembru hodi buka solusaun ba asuntu ne’e.

“Ita presiza tuur hamutuk depois buka solusaun para ita ultrapasa problema hirak ne’e, para rona kolega sira (Komité 12 Novembru) nia hakarak, maibé ita tau naran ne’e atu valoriza istória”, nia afirma.

Entantu, Prezidente K12N, Gregorio Saldanha, hatete K12N laiha koñesimentu husi Governu no kompañia ba projetu konstrusaun jardín Motaél ho naran 12 de Novembru.

“Membru Komité 12 Novembru no ha’u rasik la konkorda ho naran Jardín 12 Novembru Motaél tanba la tuir realidade no kronolojia akontesimentu ho istória ne’ebé akontese liubá”, lamenta Prezidente K12N iha sede Balidi, Dili.

Nia hatete, loloos tenke tau naran saudozu Sebastião Gomes, tanba husi akontesimentu ninia mate maka provoka joven barak nia asaun hodi fó solidariedade to’o hamosu masakre 12 Novembru 1991 iha Santa Krús, Dili.

Nune’e Gregorio triste ho desizaun Governu no kompañia hodi implementa projetu ne’e tanba la hakerek istória ho loloos.

Aléinde ne’e, Diretór Jerál Turizmu, relata projetu reabilitasaun ba jardín ne’e, MTKI  prevee iha Orsamentu Jerál Estadu 2019 atu hadi’a sítiu turístiku sira iha Dili no foho Ramelau, Bee-Manas Marobo ho osan hamutuk rihun U$400.

“Orsamentu ne’e mak ita fahe halo reabilitasaun ba sítiu turístiku sira, maibé kompañia balun sei servisu tanba ita hakarak sira konstrui ho kualidade”, Quintas dehan.

Obra ba jardín 12 de Novembro Motael ne’e ka’er husi empreza ALGIS ENG CONSULTANCY. UNIP. Lda liuhusi konkursu públiku ho montante $95.000,00 ho nia prosesu ezekusaun hahú 31 jullu to’o 07 setembru 2019.

Jornalistav: Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here