Semináriu ANC nian kona-ba seguransa sibernétika. Foto/Natalino Costa.

DILI, 03 setembru 2019 (TATOLI)-Autoridade Nasionál Komunikasaun (ANC, sigla portugés) hamutuk ho Badan Siber dan Sandi Negara (BSSN) husi Indonesia sei tulun malu iha kestaun seguransa sibernétika ka cyber security.

Prontidaun ne’e hato’o iha ámbitu semináriu dalimak entre ANC ho BSSN Indonézia nian ne’ebé hala’o iha Timor-Leste iha salaun Ministériu Transporte no Komunikasaun (MTK) ho tema “seguransa sibernétika nasionál ka national cyber security 2019”.

Prezidente ANC Timor-Leste, João Olívio Freitas, hatete seguransa sibernétika ne’e oinsá atu livre husi atake ema seluk ne’ebé bele fó distúrbiu iha serbisu. Ezemplu, asesu ba sistema free balance oinsá asegura ida ne’e para ema sira laiha autorizasaun ne’e labele asesu.

Nune’e mós haree husi ezemplu seluk hanesan fasilidade telekomunikasaun, fasilidade enerjia eletrisidade no fasilidade ba iha transportasaun.

“Bainhira fasilidade sira ne’e ita kria ne’e ho sistema, tanba ne’e ema bele ataka ita la’ós ona ho fíziku, maibé nia bele liuhusi rede sira bele tama nune’e estraga tiha sistema eletróniku sira iha laran hanesan ba eletrisidade nian ahi bele mate totalmente iha Timór”, João esplika iha Kaikoli, ohin.

Atu evita kestaun sira hanesan ne’e, papél ANC nu’udar autoridade reguladora halo esforsu bazeia ba polítika telekomunikasaun nian ne’ebé mós define iha servisu katak atu fó importánsia ba iha seguransa sibernétika, ANC rasik buka hodi halo kooperasaun ho instituisaun relevante atu halo prevensaun ba kestaun ne’e.

Iha semináriu ne’e, BSSN Indonézia ko’alia kona-ba kapasitasaun rekursu umanu nian, entaun ANC rasik buka atu aprende husi sira no BSSN rasik aseita ona hodi kapasita ANC hodi eleva koñesimentu iha área seguransa sibernétika nian.

“Durante ne’e ami halo kooperasaun ho JICA depois JICA fasilita ami bá treinamentu iha BSSN Indonézia kona-ba seguransa sibernétika, maibé agora ne’e BSSN nian reprezentante direita mai ona. Buat ne’ebé ami trajetu ba oin maka kooperasaun direita entre instituisaun Governu rua, ANC ho BSSN Indonézia, ami sei dudu ida ne’e bá oin nune’e sira bele kapasitasaun ANC Timor- Leste ligadu ba iha seguransa sibernétika ho di’ak liután”, dehan prezidente ne’e.

Iha fatin hanesan, Direktur Pengulangan dan Pemulihan Infrastruktur Verifikasi Informasi Vertikal Nasional BSSN, Maria Yunshi, hatete sira prontu fó apoiu ba ANC. “Ami sei fó apoiu kapasitasaun rekursu umanu hodi eleva koñesimentu iha área seguransa sibernétika”.

Peritu Teknolojia no Informasaun BSSN, Muhammad Salman, dehan mundu agora influensia husi rede sibernétika daudaun ne’e boot tebes, tanba mundu dijitalizasaun fó ameasa ba iha ita nian sistema sira hodi bele hafraku tanba bele infiltra husi online rasik.

Tanba ne’e semináriu refere atu fó hanoin kona-ba oinsá ameasa siber nian ba iha sistema sira, nune’e bele iha koñesimentu.

Semináriu ne’e partisipa husi funsionáriu ANC, pesoál PNTL, inklui setór privadu ne’ebé organiza husi ANC rasik no partisipa direta husi dirijente BSSN Indonézia durante loron ida.

Jornalista :  Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here