Francisco da Costa, Xefi Departementu Fizika no Desportu UNTL.Imajen/ Hortencio Sanches

DILI, 03 setembru 2019 (TATOLI) – Vise Prezidente Departementu Edukasaun Sívika no Desportu Universidade Nasionál Timor Lorosa’e (UNTL), Francisco da Costa, hateten dezenvolvimentu desportu iha Timor-Leste komesa la’o di’ak ona.

“Kona-ba desportu iha Timor ne’e komesa la’o di’ak uitoan ona, tanba antes ne’e ita seidauk iha liga maibé hafoin tinan hirak ba kotuk ne’e, liga mós hala’o eventu desportiva oioin la’os futeból deit”, tenik Francisco, iha UNTL, tersa ne’e.

Nia observa, durante ne’e Sekretaria Estadu Juventude no Desportu (SEJD) sempre aloka osan ba Federasaun Desportu hotu hodi realiza eventu desportu sira, maski ho montante ki’ik.

Francisco da Costa esplika, modalidade barak mak iha prestasaun ne’ebé di’ak partesipa iha eventu internasionál hanesan Teofilo Freitas ne’ebé hetan medalla osan-mean dala-rua tutuir malu.

Tuir nia, ida ne’e mak hatudu dezenvolvimentu desportu ne’ebé komesa avansa uitoan iha nasaun ne’e, hanesan iha mós liga ne’ebé la’o besik époka lima ona. Tanba ne’e, nia konsidera uluk ho agora iha diferensia bo’ot.

“Agora oin-seluk tanba ita ba kompete ne’e atu buka manán laos atu partesipa deit, liliu iha modalidade Atletizmu no seluk tan”, nia akresenta.

Kona-ba dezenvolvimentu infraestrutura desportu, tuir nia la’o sufisiente tanba estadiú tolu mak Governu konsege konstroi ona no hela balu mak sei iha prosesu nia laran.

“Ita hare Governu halo ona sira nia papél importante balun hanesan kontroi estádiu sira iha munisípu, bele dehan estádiu sira ne’e estandarte ona, nune’e mós Governu kria kampu Voleiból no basketból, ita hare komesa la’o neneik ona maibé fiar katak ba oin sei di’ak liu,” nia haklaken.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here