Paizajen iha área Kristu Rei. Foto espesiál.

DILI,  03 agostu 2019 (TATOLI)-Ministériu Turizmu, Komérsiu no Indústria (MTKI) planeia ona atu prevee osan iha orsamentu Jerál Estadu (OJE) 2020 hodi kontinua halo manutensaun ba sítiu turístiku sira ne’ebé hadi’a ona.

 “Ami  hahú diskute atu iha orsamentu 2020 ba Ministériu Turizmu nian sei iha item ida aloka ba manutensaun sítiu turístiku ne’ebé ita reabilita ona iha tinan ne’e”,  Diretór Jerál Turizmu, José Filipe Dias Quintas, ba Ajénsia Tatoli iha edifísiu TradeInvest, Kolmera, ohin.

Iha tinan ne’e, nia dehan aloka orsamentu rihun $400 halo reabilitasaun ba sítiu turístiku sira, nune’e presiza mós halo manutensaun kontinua atu iha kondisaun di’ak.

“Orsamentu ami sei diskute hela, maibé presiza iha osan ba manutensaun”, katak.

Diretór Jerál Turizmu ne’e husu ba abitante iha kapitál Dili atu kontinua kuida fatin turizmu ne’ebé Governu halo ona.

“Ami kontinua husu ba ita-nia komunidade sira labele estraga ita-nia jardín sira ne’ebé Governu konstrui ona tanba ita la kuida, ita sei gasta osan barak ba halo manutensaun”, nia husu.

MTKI koopera ona ho Ministériu Administrasaun Estatál no Seguransa Sivíl atu monta seguransa iha kada fatin ne’ebé reabilita no konstrui ona.

Iha 2019, MTKI reabilita sítiu turístiku iha kapitál hanesan Kristu Rei, João Paulo II iha Tasitolu, jardín Largo Lesidere, 5  Maiu, jardín 12 Novembru Motaél no munisípiu mak Bee-Manas Marobo no Foho Na’in-Feto Ramelau.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here